Print this page

Prezidente PN no Vise Prezidente sei Uza Meza ho Folin Rihun $4

By August 17, 2020 4400
Meza Foun ba Prezidente Parlamentu Nasionál (PPN) no Nia Vise Na'in rua ne'ebé to'o ona iha PN. Meza Foun ba Prezidente Parlamentu Nasionál (PPN) no Nia Vise Na'in rua ne'ebé to'o ona iha PN. Foto Tempo Timor

Tempotimor (Dili)-Parlamentu Nasional (PN) tenke hasai orsamentu hamutuk rihun $25 hodi harii hikas meza neebé deputadu bankada CNRT halo rahun.

Husi total orsamentu nee, osan $4.200 aloka ba konstrusaun meza no kadeira tolu ba Prezidente PN no Vise Prezidente nain rua.

Hanesan publiku hatene, iha fulan hirak liu ba mosu dezintendimentu entre deputadu bankada opozisaun ho bankada governu neebé rezulta meza Prezidente PN hetan estragus.

Hafoin husik durante fulan hirak nia laran, ikus mai PN konsege hetan fali meza no kadeira foun ho folin $4.200.

Tuir observasaun jornalista www.tempotimor.com iha Parlamentu Nasionál, iha Segunda (17/08), kompaña Jepara Mabel neebé konstrui meza no kadeira PN, remata ona sira-nia serbisu, no lori ona meza no kadeira refere hodi intrega ba PN.

Sekretária Jerál PN, Cedelizia Faria dos Santos informa, hafoin konstrusaun meza foun PN nee, Prezidente PN sei foti inisiativa atu loke reuniaun lider bankada hodi diskuti serimonia harii hikas meza PN.

Cedelizia dehan, husi total orsamentu rihun $25 neebé PN aloka, osan $4.200 aloka ba konstrusaun meza no kadeira tolu, no $20.800 aloka ba serimonia kultura harii meza PN.

Kona-ba folin husi kada meza no kadeira, Cedelizia dehan, nia seidauk bele komentariu, maibé nia haree iha iha diferensia uitoan entre meza Prezidente PN ho Vise Prezidente nain rua.

Iha fatin hanesan, reprezentante Kompañia Jepara Mabel, Domingos Soares hatete, meza tolu neebé nia parte halo presiza tempu fulan ida hodi konklui.

Kona-ba medida meza, nia dehan, meza ba Prezidente PN ho naruk metru 2.10 no luan metru 1, enkuantu meza ba vise Prezidente PN ho naruk metru 2 no luan metru 1.

Rate this item
(2 votes)
Last modified on Monday, 17 August 2020 17:40
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items