Deklarasaun husi observadór nee relasiona ho planu Parlamentu Nasionál atu harii edifisiu foun PN no uma ba deputadu sira iha Hera.

Tuir Victor, planu harii edifisiu PN no uma ba deputadu iha Hera sedu liu, tanba kondisaun edifisiu PN atual sei diak hela atu bele uza ba serbisu.

"Hau hanoin halo edifisiu ne'e diak, maibé ita tenke haree fila-fali ba iha kraik, hanesan dezenvoivimentu sira iha laran, bee-moos, inklui seluk-seluk tan, lao diak ona mak ita bele hanoin atu kria saida ba orgaun estadu sira, agora povu tau fiar tiha ba ita, mais ita ba halo di’ak deit ba ita-nia an, depois la haree povu nia preokupasaun, ne'e ladun di’ak," dehan nia iha nia serbisu fatin, UNTL tuan, Kaikoli, Sesta (14/08).

Tanba nee, tuir nia, diak liu PN kontinua uza edifisiu neebé daudauk nee iha hodi foku ba kondisaun povu nian, tanba povu mak importante liu.

Molok nee, iha 14 Agostu, Prezidente Parlamentu Nasional Aniceto Guterres konvoka reuniaun ho Ministru Justisa Manuel Carceres hodi koalia kona-ba planu atu hari edifisiu foun PN no uma ba deputadu sira iha Hera. Planu nee sei realiza iha tinan 2022.