"Embaixada Portugal mai vizita MAPKomS, atu kumprimenta ha'u, hanesan Ministru foun ne'ebé tutela ba Asuntu Parlamentar e Komunikasaun Sosiál, atu fó hatene fali ba ha'u kona-bá kooperasaun, entre Governu Portugal no Governu Timor-Leste, liu-liu iha área Komunikasaun Sosiál", Ministru hateten, iha gabinete MAPKomS, kinta (13/8).

Tuir Governante, durante ne'e Governu Portugal, Liu husi Institutu Camões fó apoiu kona-bá, fó formasaun jornalístiku, nomos Lian Portugés ba jornalista timor-oan sira, atu nune'e jornalista sira bele hakerek ho Lian Portugés, iha área jornalizmu nian.

"Kona-bá implementasaun programa, durante ne'e la'o hela, tinan rua (2) ona, agora atu kontinua la'o, iha tinan ida ne'e no agora iha ona ita nia Timor-oan balun, mak rekruta hanesan formadór para aban bainrua ajuda ita-nia profesór no hamutuk ho sira husi Portugal atu ajuda malu, fó nafatin formasaun Lian Portugés no ba área jornalizmu nian, atu oinsá bele hakerek ho Lian Portugés", Informa Ministru

Ministru esplika, agora avansadu ona, tanba média balun hakerek ona notísia ho Lian Portugés hanesan, média imprimi Timorpost, Ajénsia Tatoli inklui RTTL.EP no jornál ka média imprimi sira seluk ne'ebé mak hakerek ho Lian Portugés, ida ne'e mak, rezultadu husi formasaun.