‘Deskonfia EUA La Iha Boa Fe’,TL Ejize Resiprosidade ba Fatin Embaixada Nian

Ministru Justisa (MJ) Manuel Cárceres ko'alia ho jornalista sira iha PN, Kinta (13/08) Ministru Justisa (MJ) Manuel Cárceres ko'alia ho jornalista sira iha PN, Kinta (13/08) Foto Tempo Timor

Tempotimor (Dili) - Ministru Justisa (MJ), Manuel Cárceres ko'alia ona ho Embaixadora Estudu Unidus Amérika ho intensaun atu halo resiprosidade ba Embaixada Timor-leste nian iha Wasington-Amérika.

Ministru hatete, enkontru ho Embaixadora Estadu Unidus Amérika atu halo alterasaun ba kontratu arendamentu no husu atu sira mós fasilita embaixada Timor nian, iha sira nia rain.

"Sira (Amérika) hakarak hadi'a no sira iha kontratu ho Estadu, nune'e mak ko'alia para haree took oinsá atu kontratu arrendamentu, no ha'u mós husu ba sira see Estadu Timor-Leste fó ajuda Embaixada Estadu Unidus Amérika nian iha Dili, entaun ami mós husu para Estadu Unidus Amérika mós ajuda ami nia Embaixada iha Washington", informa nia, iha knaar fatin, edifísiu Ministériu Justisa, kaikoli, Kinta (13/08).

Nune'e, nia dehan, iha ona konkordánsia katak, EUA mós hatudu ona fatin ida ba Embaixada TL iha Washington.

"Iha Washington mós sira hatudu ona uma ida ba ita-nia Embaixada no agora tama ba iha faze negosiasaun atu haree kontratu arrendamentu, atu halo alterasaun ba kontratu arrendamentu ne'e no negosiasaun ne'e la'o mak hein took", tenik nia.

Tanba ne'e, tuir planu, ekipa téknika husi Ministériu Negósiu Estranjeiru no Kooperasaun (MNEK) ho Ministériu Justisa (MJ) nian mak sei ba haree fatin ne'ebé EUA fó ona Embaixada TL.

Nia hatutan, Embaixadora EUA mós prontu atu hadi'a uma ida iha Washington para halo Embaixada TL.

Alende ne'e, kontratu arrendamentu ne'ebé Embaixada EUA halo ho Estadu TL ho durasaun to'o tinan 2032.

"Durante ne'e iha estabelesimentu ita kontratu arrendamentu ho Estadu Unidus Amérika ne'e to'o tinan 2032 no kontratu arrendamentu ne'e daudaun la'o hela", nia akresenta.

Governante ne'e afirma, kontratu arrendamentu ne'ebé fó ba Embaixada EUA ho durasaun tempu to'o tinan 2032 ne'e, lei mós garante hela.

"Tuir ita nia Lei bele fo ba sira tinan 100, nune'e mós ita nian iha ne’ebá bele to'o tinan 100, tanba ne'e ba oin sira sei haruka karta ida ba Ministériu Negósiu Estranjeiru no Kooperasaun para depois ekipa justisa nian hasoru-malu ho ekipa Estadu Unidus Amérika embaixada nian ho ekipa MNEK nian para atu haree termu tékniku atu bele haree alterasaun kontratu arendamentu ne'e", tenik nia.

Nia parte, seidauk hatene kona-ba kontratu arendamentu ne'ebé Embaixada EUA selu ba Estadu Timor-Leste, maibé prosesu kontratu ne’e la'o di’ak. (*)

Rate this item
(0 votes)
Last modified on Friday, 14 August 2020 07:03
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.