Vise MS Garante, Tempu Badak sei Distribui Ambulansia ba Munísipu sira

Ambulansia ne'ebe Governu Timor Leste sosa, para lina iha Liuron ninin besik portu Dili (11/8) Ambulansia ne'ebe Governu Timor Leste sosa, para lina iha Liuron ninin besik portu Dili (11/8) Foto Tempo Timor

Tempotimor (Dili)-Vise Ministru Saúde Bonifacio Maucoli garante katak iha tempu badak nia laran ambulansia ne’ebé Ministériu Saúde (MS) sosa sei distribui ba munisipiu 12 no mós Rejiaun Administrativu Espesial Oekusse-Ambeno.

Maucoli hatete, foin lalais ne’e MS sosa ambulansia multi-funsaun unidade 16, no daudauk ne’e sei iha prosesu inspesaun.

"Ambulansia multi-funsaun ne'e agora para ona iha resintu Ministériu Saúde nian, hein de'it ekipa RNI halo inspesaun depois iha tempu badak sei distribui ba munisípiu sira," dehan Maucoli ba jornalista sira iha Kampung Alor, Kuarta (12/08).

Maucoli hatutan, ambulansia ne’ebé sei fahe ba munisipiu sira sei haree ba númeru populasaun, katak munisipiu sira ho númeru populasaun boot liu Baukau, Ermera, no Lautem, sei hetan ambulansia rua, enkuantu sira seluk sei hetan ambulansia ida-ida.

Entretantu, hatan kona-ba pesoál saúde ne'ebé menus iha postu sira, Maucoli dehan, MS loke ona vaga, no tuir planu sei rekruta pesoal saúde hamutuk 200 resin.

"Sei iha hela vaga 200 resin mak sei loke hela konkursu no balun apply ona, entaun hein katak ema bele ense ona par ita koloka ba sentru saúde no postu saúde sira ne'ebé sei menus," dehan Maucoli.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.