Iha serimónia handover maskára ba MS ne'e, Vise-Ministru Saúde, Bonifácio Maucoli dos Reis hateten, marka tan istória ida ba TL no Fundasaun Alibaba. Tan ne'e, lori governu nia naran agrdese ba parseiru sira ne'ebé kontinua apoiu TL.
"Governu TL apresia ba apoiu ida ne'e, ita hatene katak ita rejista kazu Covid-19 hahú husi Janeiru 2020 mai oin ita rejista kazu pozitivu 24, depois iha 4 Agostu semana kotuk ita rejista tan kazu ida," nia dehan, ba jornalista sira iha edifísiu SAMES, Kampung Alor, Kuarta (12/08).
Bonifácio mós dehan, apoiu ne'ebé parseiru sira fó governu kontinua distribui ba pesoál saúde sira, inklui mós ba eskola sira, inklui entidade sira ne'ebé liga direta ho Covid-19.
Iha fatin hanesan, Embaixadór Repúblika Populár Xina iha Timor-Leste, Xiao Jianguo katak, apoiu ne'ebé Fudasaun Alibaba fó ba TL hamutuk dala rua ona.
"Apoiu dahuluk maka maskára, ventiladór no mákina teste ba Covid nian. Agora iha doasaun daruak ne'e mak maskara", dehan nia.
Embaixadór ne'e afirma, apoiu TL ne'e papél importante tanba bele kombate hasoru Covid-19, entaun apoiu TL ho kapasidade públiku no privadu.
Kazu foun ne'e sai ameasa boot ba TL, entaun kontinua distribui maskara sira ne'e para proteje liután komunidade sira, liuliu kumpre regra sira ne'ebé governu implementa. (*)
