Print this page

MAPKomS: Kompañia Média La Rejistu, INSS sei La Selu Subsídiu 60%

By August 11, 2020 2383
Ministru Asuntu Parlamentar no Komunikasaun Sosial (MAPKOMS) Francisco Jerónimo dehan ba jornalista iha PN, tersa (11/8). Ministru Asuntu Parlamentar no Komunikasaun Sosial (MAPKOMS) Francisco Jerónimo dehan ba jornalista iha PN, tersa (11/8). Foto Tempo Timor

Tempotimor (Dili) - Ministru Asuntu Parlamentár no Komunikasaun Sosiál (MAPKomS), Francisco Jerónimo deklara, kompañia média sira ne'ebé to'o agora seidauk rejista no la prienxe kritériu husi Institutu Nasionál no Seguransa Sosiál (INSS) maka sei la asesu ba pagamentu 60% husi governu.

Ne’e duni, nia husu ba média ne'ebé seidauk prienxe rekizitu atu rejista iha INSS atu bele selu taxa kada fulan, nune'e ba oin sira mós bele hetan subsídiu.

Nia esplika, média ne'e hanesan empreza ida bainhira harii no halo ona rekrutamentu ba traballadór sira, ne’e duni tenke lori ba rejista iha INSS atu bele selu taxa fulan-fulan.

Nia hatutan, maibé kritériu ne'e mak média sira la kumpre, entaun oinsá bele hetan apoiu subsídiu ruma husi INSS.

"Se agora labele hetan 60% entaun tenke rejistu ona para aban-bainrua ne'e bele iha," dehan Ministru Jerónimo, ba jornalista, iha Parlamentu Nasionál (PN), Tersa (11/8).

Kona-ba 60% ne'ebé INSS atu fó, nia dehan, ne'e la’ós atu fó ba média, maibé fó ba traballadór sira ne'ebé servisu.

"60% ne'e la’ós atu ajuda ba média, maibé tanba média labele selu ona nia traballadór sira, dala-ruma sira hatún traballadór sira nia osan, dala-ruma sira selu balun de’it no sira balun la to'o iha tempu ne'e. Entaun, governu ajuda fali 60% mas transfere direta ba konta bankária traballadór sira-nian. Agora pergunta mak ne'e, média sira halo sira-nia obrigasaun ka lae. Durante ne'e harii média mas halo obrigasaun tuir iha lei hatete ne'e ka lae. Se la halo tuir entaun tenke hahú halo," dehan nia.

Nia afirma média nu’udar empreza entaun haree rejistu ona, tanba la hatene Estadu Emerjénsia no Covid-19 nia prosesu ne'e la'o to'o iha ne'ebé maka hotu. (*)  

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items