Ne’e duni, Parlamentu Nasionál husu ba Governu atu aselera lalais prosesu ne’e tanba entidade sira seluk ne’ebé tama mós kategoria ne’e simu ona subsídiu, maibé úniku jornalista sira maka seidauk simu.
Prezidente Partidu Demokrátiku (PD), Mariano Assanami Sabino, husu atu governu apoiu másimu ba média inklui jornalista sira durante implementasaun Estadu Emerjénsia ba dala haat.
"Konsisténsia Governu nian dehan atu apoiu jornalista sira iha front line tenke aselera, tanba sira hatama ona konta bankária, mai be daudaun ne'e apoiu ne'e too iha ne'ebé," dehan Prezidente PD, iha Uma Fukun Parlamentu Nasionál, Tersa (11/08).
Nia husu atu governu ezekuta ona fundu ne'ebé apoiu ba média, tanba sira ne'e vitál tebes ba nasaun no sira mak informa mós situasaun hotu-hotu kona-ba Covid-19 nian ba povu, nune'e hakmatek no iha asesu informasaun ho loloos.
"Tanba ne'e, tenke konsisténsia apoiu ba média, liuliu ba jornalista sira ne'ebé iha front line," dehan Assanami.
Entretantu, antes ne'e, Ministru Asuntu Parlamentár no Komunikasaun Sosiál (MAPKomS), Francisco Jerónimo, husu atu jornalista sira atu mantein pasiénsia hodi hein tanba prosesu sei la’o hela. (*)