Print this page

Defensór Povu Sai Fali Autór Violasaun

By August 11, 2020 2806

Tempotimor (Dili) - Relasiona ho atu husi adjuntu Polísia Sientífika Investigasaun Kriminál (PSIK), iha loron 4 Agostu, halo ameasa ba ekipa Front Universitáriu Timor Leste (FUTL) nu’udar asaun violasaun kontra direitu umanu.

Fundasaun Mahein konsidera PSIK nu’udar defensór povu nian, maibé sira raik maka sai fali autór violasaun direitu umanu, hanesan hahalok ne’ebé hatudu bainhira hasoru malu ho reprezentante FUTL.

Diretór FM, João Almeida hateten, liga ba PSIK halo ameasa ba estudante sira ne'e viola direitu umanu. Loloos PSIK tenke asegura povu-nia direitu para hato'o sira-nia petisaun.

“PSIK labele sai fali barreira ba povu-nia direitu, tanba ne'e mak kuandu impede direitu povu nian ne'e kategoria ona violasaun direitu umanu," nia tenik ba jornalista sira, iha knaar fatin, Fomentu, Segunda (10/08)

Nia akresenta, loloos ne'e polisia mak sai defensór ba direitu umanu, agora polisia mak impede fali sidadaun nia direitu ne'e labele aseita.

Haree husi natureza servisu PSIK nian ne’ebé la klaru, FM mós husu ba Governu no Parlamentu Nasionál atu hamosu Lei Organizasaun Investigasaun Kriminál (LOIK).

"PSIK harii tinan neen ona, buat ne'ebé ita presiza hadi'a liután maka governu tenke kria lei ida naran Lei Organizasaun Investigasaun Kriminál (LOIK), nune'e bele define ida-idak ninia tarefa, tanba see lae kazu violénsia doméstika PNTL investiga, PSIK mós investiga, hotu-hotu halo servisu hanesan, droga, money laundry, tráfiku umanu, hotu-hotu halo, entaun iha duplikasaun," dehan Diretór FM.

Nia afirma, PSIK la'ós orden públika, maibé ida ne'ebé atu tau matan ba kazu investigasaun sira. Entaun kazu sira ne'ebé liga ho orden públiku ne'e PNTL mak tau matan.

Natureza orgánika PSIK nian servisu mak tau matan de'it ba kazu sira ne'ebé mak iha ámbitu investigasaun kriminál nian, hanesan kazu sira ne'ebé kompleksu no organizadu. (*)  

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items