Tempu Badak, ‘Tebe-Sai’ Prezidente Autoridade no Administradór Postu

Ministru Administrasaun Estatal (MAE) Miguel Pereira de Carvalho ko'alia hela ba jornalista sira iha palasiu governu, segunda (10/08). Ministru Administrasaun Estatal (MAE) Miguel Pereira de Carvalho ko'alia hela ba jornalista sira iha palasiu governu, segunda (10/08). Foto Tempo Timor

Tempotimor (Dili) - Governu trasa ona planu atu ‘tebe-sai’ prezidente autoridade munisipál no administradór postu sira ne’ebé to’o ohin loron sei asume hela kargu ne’e.

Ministru Administrasaun Estatál (MAE), Miguel Pereira de Carvalho hatete, tempu badak sei hahú halo rekrutamentu ba prezidente autoridade munisipál no administradór postu balun, tanba daudaun ne’e halo ona prosesu revizaun ba sira-nia mandatu.

"Sei halo rekrutamentu konkursu pur méritu iha munisípiu sira no ami sei hahú iha munisípiu balun iha tempu badak," dehan nia, iha Palasiu Governu, Segunda (10/08).

Nia hatutan, mandatu ba prezidente autoridade munisipál no administradór postu sira daudaun MAE halo ona revizaun hodi loke konkursu iha tempu tuir mai.

Antes ne'e, iha loron 21 Jullu 2020, Ministru Miguel fó sai ona informasaun kona-ba mandatu prezidente autoridade no administradór postu.

Mandatu prezidente autoridade munisipál no administradór postu sira ne'e tenke haree tuir dekretu lei númeru 3/2016 no artigu númeru 18 halo ona aliterasaun ba dekretu lei númeru 1/2018, ne'ebé aprova iha 2016.

Tránzitu okupante kargu administradór sira iha tempu ne'ebá ba administradór postu no mós prezidente autoridade hodi kompleta mandatu ne'ebé hetan nomeasaun husi Komisaun Funsaun Públika (KFP), maibé agora tenke haree mandatu ne'ebé nomeia hosi KFP ne'e remata ona ka seidauk. (*) 

Rate this item
(2 votes)
Last modified on Tuesday, 11 August 2020 08:26
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.