Ministru Fransisco Jeronimo dehan, diálogu importante ba média sira iha kestaun hotu-hotu. Tanba ne'e, foin lalais MAPKomS mós deside hodi halo diálogu ho petisionáriu na'in 31 hodi buka solusaun.

Tuir nia, kuandu uza dalan diálogu maka laiha solusaun entaun bele buka dalan seluk, maibé pozisaun governu sei nafatin iha responsabilidade atu halo diálogu maski la envolve iha problema ne'e.

"Ha'u hakarak hatete katak, dala-ruma ita mai halo barreira ba malu,  dala-ruma ita mai ho konseitu rasik no ita lakohi hakruuk ba malu, nune'e dala-barak ita atu halo diálogu atu hetan solusaun ne'ebé di'ak liu ne'e difisil la halimar," dehan Ministru Jerónimo, hafoin vizita ba Asosiasaun Jornalista Timor-leste (AJTL), iha Fatuhada, Sesta (7/8).

Nia esplika, dalan diálogu ne'e nu'udár faze ida atu aprende katak, hakiduk uituan ba kotuk atu oinsá bele tama hamutuk hodi hetan solusun ne'ebé di'ak ba hotu-hotu.

Tanba,  tuir nia, bainhira hotu-hotu hakarak prekorre ba justisa mak deside, solusaun ikus mak tenke hirus malu, la gosta malu no dala-ruma hasoru malu ho oin-bot.

Tan ne'e, governante ne'e nafatin ho fuan boot hodi husu ba média inklui jornalista sira atu nafatin hamutuk no únidu atu halo servisu hamutuk iha orgaun komunikasaun sosiál hodi dezenvolve informasaun kualidade no kredivel ba povu iha nasaun ne'e. (*)