Ho aplikasaun EE dahaat ne’e, Victor dehan, governu tenke hatudu ninia seriedade hodi segura seguransa, liu-liu iha liña fronteira.
Tuir nia, kazu Covid-19 foun konsege tama iha TL, tanba durante ne’e governu la sériu taka fronteira no la halo vizilansia masimu.
"Ida ne'e (Kazu Covid-19 foun) tanba sala husi ita, depois ita kontente tiha hapara estadu emerjénsia la hanoin ida ne’e, ikus mai mak afeta ba ida pozitivu," dehan Victor ba jornalísta sira iha nia knaar fatin Kaikoli, Kinta (06/08).
Ba EE dahaat ne’e, nia dehan, di’ak liu governu rigorozu liu tan iha area fronteira hodi evita ameasa Covid-19 husi rai seluk tama iha TL.
"Iha EE dahaat ne'e fronteira ho portu ne’e mantein, se bele karik taka totalmente, ita-nia Timor-oan sira iha Indonézia lalika mai, iha ne'ebá de’it, karik mai, ita tenke prepara kondisaun, liu-liu kona-ba fatin atu kuaretena sira, no fatin izolamentu ne'e kontinua," dehan nia.