Prezidente Parlamentu Nasionál (PPN), Aniceto Longuinhos Guterres informa, kona-bá mensajen Prezidente Repúblika inklui projetu rezolusaun ba deklarasaun Estadu emerjénsia, Parlamentu aprova ona, ida ne'e, sei fó kompeténsia tomak ba PR, atu dekreta estadu emerjénsia.
"Agora buat hotu los ona, ita aprova hotu ona tanba ne'e ita fó autorizasaun ba PR, atu bele dekreta estadu emerjénsia ba faze dahaat nian," dehan Prezidente Parlamenu Nasionál, Aniceto Longuinhos Guterres, hafoin finaliza aprovasaun ba deklarasaun estadu emerjénsia, liu husi plenária estraordináriu, iha Parlamentu Nasional, kuarta (5/8).
Nia dehan, husi Aprovasun ne'e, PN manten nafatin mensajen PR nian, ne'ebé atu dekreta EE durante loron 30, hahú husi tuku 00:00 loron 6 fulan Agostu tinan 2020 ne'e.
Entretantu, Molok tama ba votasaun, deputadu bankada CNRT, hamutuk na'in neen desidi, sai husi plenária estraordinária, ho razaun, meza la dun konsidera CNRT nia preokupasaun.
Tuir deputadu Patrocínio Fernandes katak, sira desidi sai husi plenária, bazeia ba desizaun, ne'ebé anúnsia husi Prezidente PN, iha plenária laran.
"Hanoin se meza fó sai hanesan ne'e ona, ne'ebé ami husi bankada CNRT la vota afavor, tanba ne'e, ami bele sai ba liur ona, tuir deklarasaun ne'ebé meza desidi," Dehan nia.