Diretór Ezekutivu Forum Organizasaun Naun Governamentál Timor-Leste (FONGTIL), Daniel Santos do Carmo hateten, aktu brutalizmu ne'e la'ós Ministru Justisa (MJ) mak orienta, maibé iha funsionáriu balun mak hatudu hahalok ne’e.
"Situasaun ne'e akontese, tanba falta de étika husi oknum funsionáriu sira iha ne'ebá, la'ós funsionáriu hotu iha Ministériu Justisa no ha'u la fiar ministru ida hanesan Manuel Cárceres orienta funsionáriu sira atu halo ameasa ne'e," nia akresenta.
Nia subliña, sei halo komunikasaun ho Ministru Justisa inklui funsionáriu ne'ebé halo ameasa ba ekipa FMTL.
"Ita lamenta ho ema servidór estadu ida mak hatudu atitude hanesan ema premanizmu," tenik Daniel.
Diretór ezekutivu ne'e mós dehan, bainhira kazu iha tendensiozu maka sei lori funsionáriu MJ nian ba Ministériu Públiku no Komisaun Funsaun Publika.
"Ami sei haree kazu ne'e, sei haree hotu maka deskobre katak iha tendensiozu ba ameasa, ne'e ita iha dalan legál para bele kestiona. Bele hakerek karta ba Ministériu Públiku (MP) no Komisaun Funsaun Públika (KFP) kona-ba hahalok ida hanesan ne'e," nia dehan.
Entretantu, ameasa ne'ebé pesoal funsionáriu Ministériu Justisa halo hasoru ekipa FMTL aserku sira ho ema isin boot, tuku meza no ameasa sira labele ko'alia nem liafuan ida.
“Sira maka bolu ami halo audiénsia ho sira, maibé iha laran, sira aserku ami ho ema isin boboot sira, ameasa ami no limita para ami labele ko’alia saida maka ami hanoin. Sira haleu ami, sira baku meza no haruka ami labele ko’alia, ne’e maka halo ha’u tanis, tanba povu ne’e kala laiha lian duni ona," dehan Noe. (*)