KSDS-KE Apoiu EE Dahaat, PR Lu Olo sei husu “Lisensa” ba PN

Palasiu Prezidente da Republika Demokratika Timor Leste Palasiu Prezidente da Republika Demokratika Timor Leste Foto suplai

Tempotimor (Dili)- Konsellu Superiór Defeza no Seguransa (KSDS) no Konsellu Estadu (KE) hfó votus unanimidade ba pedidu husi governu atu Prezidente Repúblika Francisco Guterres Lu Olo deklara tan estadu emerjensia (EE) ba dala haat.

Desizaun ida ne’e foti liu husi enkontru ne’ebé PR Lu Olo organiza hamutuk ho membru KSDS no KE, iha palasiu prezidensial, Bairo-pite, Kuarta (05/08).

Hafoin rona opiniaun husi membru KSDS no KE, PR Lu Olo sei haruka karta no husu autorizasaun ba Parlamentu Nasionál (PN) atu deklara tan EE.

Tuir asesór polítiku Prezidente Repúblika nian Grigório de Sousa, KSDS no KE manifesta sira-nia apoiu ba PR Lú Olo hodi dekreta tan estadu emerjénsia.

"Iha enkontru dahuluk ho Konsellu Superiór Defeza no Seguransa (KSDS), sira manifesta sira-nia apoiu ba pedidu governu nian kona-ba estadu emerjénsia, depois enkontru daruak ho Konsellu Estadu (KE) sira mós manifesta sira-nia apoiu," dehan Grigório ba jornalista sira iha Palásiu Prezidensiál.

Maske nune’e, nia hatete, iha reuniaun ne’e, PR Lu Olo hatete, bainhira PN autoriza atu deklara EE dahaat, durante ninia implementasaun, governu presiza buka dalan seluk hodi labele repete tan EE.

"Iha estadu emerjénsia ida ne'e, bele buka dalan hodi haree solusaun seluk, iha lei balun par labele repete tan estadu emerjénsia," nia dehan.

Hafoin enkontru ne’e, Grigoria dehan, karik iha lokraik PR Lú Olo sei haruka pedidu autorizasaun ba PN atu bele deskute iha tempu badak.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.