FUTL Konsidera Ministru Cárceres Inkapasidade no 'Bulak'

Demonstrasaun Kontra Ministru Justisa nia Proposta hodi Kriminaliza Difamasaun (3/8) Demonstrasaun Kontra Ministru Justisa nia Proposta hodi Kriminaliza Difamasaun (3/8) Foto Tempo Timor

Tempotimor (Dili) - Relasiona ho ezbosu kriminaliza Lei Difamasaun ne'ebé inisia husi Ministru Justisa (MJ), Manuel Carçeres, maka sosiedade sivíl no Front Universitáriu Timor Leste (FUTL) konsidera nia inkapasidade no 'bulak' tanba la hatene distinge lei penál no lei sivíl.



"Lei ne'e mosu tanba hatudu inkapasidade husi ita-nia governu. Atu resposta ba problema sosiál ne'ebé ita-nia povu enfrenta, entaun halo kriminaliza Lei Difamasaun para salva sira-nia aan, povu labele krítika, sosiedade labele krítika inklui média labele krítika sira para sira halo buat hotu tuir sira-nia gostu," dehan reprezentante sosiedade sivíl, Daniel Santos do Carmo, bainhira hato'o ninia deklarasaun, iha asaun pasífika ne'ebé organiza husi FUTL no AJTL, Segunda (03/08).

Nia afirma, Ministru Justisa inkapasidade ne'e mak la haree ba lei importante sira, maibé hakarak mak proteje kriminozu sira.

"Lei ida importante loos mak Ministru Justisa la halo, hanesan lei rejime espesiál titularidade imoveis. Lei ida ne'ebé importante atu proteje no salvaguarda povu nia direitu ba propriedade, lei ne'e pormulga ona iha tempu Prezidente Repúblika (PR), Taur Matan Ruak, ninian iha tinan 2017, maibé to'o agora la implementa tanba inkapasidade Ministru Cárcerea nian," nia dehan.

Tanba, Ministru Justisa inkapasidade ona, entaun la hatene halo lei komplementar sira para proteje povu nia direitu, entaun fila halo fali ezbosu kriminaliza Lei Difamasaun para povu tauk ministru hanesan Maromak.

Iha fatin hanesan, portavoz FUTL Joselino Pereira, konsidera MJ no nia asesór jurídika moras mental, entaun halo lei la hatene elabora lei.

"Lei ne'ebé iha MJ ho nia ekipa dehan fali lei kodigu sivíl ne'e la forte, lei ne'e forte, soké ema mak laiha kapasidade atu ezekuta, Ministri Justisa la hatene atu elabora rekursu umanu para ezekuta lei ne'e ho di'ak," nia dehan.

See asesór jurídiku Ministru Justisa nian mak dehan lei kodigu sivíl la forsa, ne'e moras mental.

"Lei ne'e nia karakterístika iha oin tolu, hanesan atinje, regula no obriga. See asesór Ministru Justisa nian mak dehan lei la forte, nia moras mental, moras mental, moras mental," nia afirma.

Portavoz ne'e mós dehan, la'ós asesór MJ nian de'it mak moras mental, maibé Ministru Càrceres mós moras metal hotu.

"Tuir ema ne'ebé estuda direitu katak, lei inan nunka prevalese ba lei oan, maibé lei oan mak prevalese ba lei inan. Iha ne'ebé lei oan kontra fali lei inan, ne'e Ministru Justisa moras mental, tanba la hatene distige kazu penál no kazu sivíl," dehan Joselino. (*)  

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.