Tuir planu, ohin (03/08), Konsellu Ministru (KM) liu husi reuniaun estraordinaria sei diskuti tan proposta ba Prezidente Repúblika kona-ba deklarasaun Estadu Emerjensia.
Ba kestaun ne’e, deputadu KHUNTO Antonio Verdial hatete, bainhira governu nia objetivu husi EE ne’e atu prevene Covid-19, di’ak liu EE ne’e implementa de’it iha fronteira.
"Se karik tempu agora mak halo tan estadu emerjensia ne’e ha’u hanoin la loos, tanba ne’e karik governu iha sentimentu ameasadu entaun beke aplika ba fatin ida ne’ebé mak konsidera hanesan rsiku ba Covid-19," dehan Verdial iha PN, Segunda (03/08).
Iha fatin hanesan, deputadu bankada FRETILIN José Agustino Siqueira Xomotxo konsidera EE ne’e iha fatin duni tanba Covid-19 sei sirkula maka’as tebes iha nasaun viziñu sira.
“Ha’u hanoin deliberasun estadu emerjensia Timor-Leste presiza tanba nasun viziñu sira mós agora dadaun covid-19 ne’e sei lao, entaun ita mós tenke iha duni deklarasaun EE atu bele limite ema tama-sai," dehan nia.