Login to your account

Username *
Password *
Remember Me

PN Konsidera Hili Membru KI La Importante

Plenaria Parlamentu Nasional Plenaria Parlamentu Nasional Foto File

Tempotimor (Dili) - Parlamentu Nasionál (PN) deside kansela ajenda eleisaun membru na’in-rua (2) ba Konsellu Imprensea (KI) tanba sira konsidera ajenda la prienxe kritériu importante atu halo eleisaun.


Maski reuniaun lider bankada deside ona ajenda atu hala'o eleisaun ba pakote 4 ne'ebe atu kandidtu ba membru Konsellu Imprensa, maibé eleisaun ne'e la konsege realiza iha plenária tanba hetan impedimentu husi deputadu bankada maioria iha PN.

Liuhusi plenária estraordinária, Xefe Bankada KHUNTO, Deputada Olinda Guterres, husu ba Meza PN atu kansela ajenda eleisaun ba kandidatu Konsellu Imprensa tanba ajende ne'e la importante.

“Ha’u hanoin suspende tiha de’it tanba ajenda ne’e ladún penting,” dehan nia, liuhusi plenária estraordinária Parlamentu Nasionál, Kinta (30/7).

Iha fatin hanesan, deputadu Bankada PLP, Deputadu Francisco Vasconcelos hateten, asuntu sira-ne’ebé la importante husik lai no diskute uluk Lei Kódigu Mineiru.

“Ajenda ba membru Konsellu Imprensa iha semana kotuk ita ko’alia duni mas ha’u konkorda ho bankada FRETILIN tanba iha lei dehan jornalista ida no jurista ida, regra eleisaun mós iha líder bankada ita seidauk akresenta loloos kona-ba mekanizmu eleisaun ne’e. Tanba ne’e, di’ak liu define lai regra, depois mak lori mai iha plenária. Ne’ebé, depois resesu mak ita halo eleisaun, laiha urjénsia liu”, dehan nia.

Nune'e, Xefe Bankada FRETILIN, Deputadu Francisco Miranda Branco, husu adia ajenda eleisaun ne’e tanba seidauk iha metodolojia hodi define prosesu eleisaun.

“Prosesu eleisaun ne’e atu la’o di’ak, ami propoin enkontru líder bankada define kedas metodolojia para fasilita ita-nia prosesu eleisaun ne’e, ami haree kompleksu uitoan tanba kandidatu na’in-haat, tolu jornalista no ida jurista, ne’e para fasilita ita-nia prosesu eleisaun, ne’ebé ita define lai metodolojia," tenik nia.

Purtantu Deputada Bankada CNRT, Maria Terezinha Viegas, konkorda ideia Xefe Bankada FRETILIN nian tanba iha reuniaun lider bankada iha semana rua liu ba Bankada CNRT propoin proporsionalidade ba eleisaun membru Konsellu Imprensa.

“Tanba ne’e mak ami submete husu fila-fali ba desizaun plenária nian”, dehan Deputada Bankada CNRT ne’e.

Ho sujestaun hirak ne’e, Vise-Prezidente Parlamentu Nasionál, Deputada Maria Angelina Sarmento Lopes, deside adia ajenda eleisaun ne’e ba loron seluk.

“Ha’u hanoin ejizénsia hosi Lei Komunikasaun Sosiál fó hanoin mai ita define uluk lai prosedimentu ka metodolojia katak kandidatu individuál ka kandidatu mai ho pakote, liuliu kona-ba kompozisaun Konsellu Imprensa. Ha’u hanoin meza konkorda opiniaun hosi bankada FRETILIN, PLP no Bankada KHUNTO katak atu define uluk lai metodolojia eleisaun ba kandidatu sira”,  dehan nia.

Molok ne'e, Bankada CNRT propoin Expedito Dias Ximenes no Bankada FRETILIN mantein Paulo Adriano da Cruz, Bankada UDT/FM propoin Deonaia da Silva Pereira, no  PLP aprezenta Jordão Antero Marques. (*)  

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« February 2024 »
Mon Tue Wed Thu Fri Sat Sun
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29      

Tempo Timor Networks

Online Counter