Kazu hanesan ne’e la’os akontese de’it iha sorumutu baibain entre kolega ho kolega, maibé mosu mós iha instituisaun estadu ida ne’ebé haran an reprezentante povu.

Iha Tersa (28/07), Parlamentu Nasionál iha ajenda ida atu rona relatoriu kona-ba servisu durante periodu Estadu Emerjenisa husi Primeiru Ministru Taur Matan Ruak no ekipa Sentru Integradu Jestaun Krize (SIJK), no tuir orariu, plenaria PN sei hahú iha tuku 10.00 oras Timor-Leste.

Tuir observasaun jornalista www.tempotimor.com iha PN, PM Taur ho ekipa SIJK hahú marka prezensa iha PN molok tuku 10.00, maske nune’e, plenaria ne’e seidauk bele hahú tanba deputadu barak mak seidauk marka prezensa.

Oras la’o ba daudauk no hatudu ona tuku 11.30, maibé kadeira deputadu PN sira seidauk ense hotu, liu-liu kadeira husi deputadu bankada CNRT besik 10 mak sei mamuk.

Maske seidauk kompletu, maibé meza PN deside hodi hahú plenaria. 

Deputadu husi Bankada PLP, Cornelio Gama ‘L-7’ preokupa deputadu sira ne’ebé dada oras no falta iha plenaria ida ne’e.

"Ohin ita debate haruka Sekretaria meza Parlamentu Nasional lee rezimentu artigu 10 maibé, ita haree kadeira sira ne'e husik mamuk de'it, ukun nusa mak hanesan ne'e," dehan L-7.

L-7 dehan, deputadu sira iha PN atu hala’o atividade, la’os husik mamuk de’it kadeira.

"Agora kadeira sira husik mamuk hanesan ne'e, ita hakarak ukun ou lakohi ukun?. Uluk ami simu kartus, agora ita simu osan, maibé nusa kadeira mamuk hotu de'it? ha’u la konkorda ida ne'e," dehan nia.

Tan ne’e, L-7 husu ba deputadu sira atu labele halimar ho nasaun ne’e, tanba nasaun ne’e lori raan no ruin mak harii.

"Ha’u husu ita labele halimar ho nasaun ida ne'e. Agora ministru sira iha ona, depois ita mai ikus mak husu perguntas la tuir lia loos."

Tuir deputadu L-7, PN iha nasaun seluk implementa regras ne’ebé rigorozu ba oras serbisu nian. Bainhira deputadu ida tarde menutu 5 de’it mós labele tama.

"Iha rai boot, liu 5 menutus odamatan sira taka hotu, la tama ona Parlamentu Nasional, agora ita halimar fali nasaun ida ne'e.”

Iha fatin hanesan, Prezidente PN Aniceto Longuinhos Guterres husu ba deputadu sira hotu atu hatudu sira-nia konsensia hodi kumpre oras ne’ebé marka ona.

"Ha’u husu ita tau konsensia ba, liu-liu ita deputadu sira," dehan Aniceto.