Nune'e, tuir planu, iha semana ne'e nia-laran, ministériu tolu ne'e sei fila hodi aprezenta ida-idak ninia planu ba Xefe Governu.
Vise-Primeiru Ministru no Ministru Planu Ordenamentu Teritorial (MPOT), José Maria dos Reis hateten, planu infraestrutura ne'ebé sai prioridade iha tinan 2021 no atu aprezenta fali ba Primeiru Ministru, Taur Matan Ruak, hanesan bee moos, edukasaun no saúde.
"Semana ida ne'e nia-laran sei mai aprezenta fila-fali ba Primeiru Ministru, Taur Matan Ruak," dehan nia, hafoin reuniaun ho Primeiru Ministru, Taur Matan Ruak, iha Palásiu Governu, Segunda (27/07).
Governante ne'e afirma, soru-mutu ne'e atu deside planu infraestrutura ne'ebé prioridade ba Orsamentu Jerál Estadu (OJE) tinan 2021.
"Primeiru Ministru ne'ebé konvida Ministériu tolu hanesan Ministru Obras Públika (MOP), Ministériu Transporte no Komunikasaun (MTK) no hau rasik para atu bele koordena área infraestrutura no bele fó prioridade liu ba área infraestrutura ne'ebé iha programa Orsamentu Jerál Estadu (OJE) tinan 2021 nian," tenik Reis.
Nia mos dehan, iha soru-mutu ne'e Primeiru Ministru (PM), Taur Matan Ruak, fo ona instrusaun atu ministériu tolu ne'e tur hamutuk fali atu bele diskute klean liu kona-ba instrusaun ne'ebé iha ona, atu bele define loloos kalendáriu ba jornada orsamentu nian hodi aprezenta fali ba Primeiru Ministru.
Minísteriu ne'ebé reuniaun ho Primeiru Ministru, Taur Matan Ruak, hodi prepara planu infraestrutura ba programa OJE 2021 maka Ministériu Planu Ordenamentu Territoriál (MPOT), Ministériu Obras Públika (MOP) no Ministériu Transporte Komunikasaun (MTK). (*)