Tuir Deputadu Francisco Branco nia hare katak,”asaun Xanana nian ne'ebé 'gosta' hoban-aan iha tahu-laran hanesan retorika de'it no buka Populizmu.”
“Ita heree senáriu ne’ebé iha, señor Xanana rasik tuun hamoos tahu, hanesan baibain ita akompaña ona iha tinan sanulu nia laran, maibé estrañu mós señor Diretór Jerál Ajensia Dezenvolvimentu Nasionál (ADN) mós ba hotu tahu laran, la hatene buka saida mak iha tahu ne’ebá, karik iha sasán osan-mean ida maka iha ne’ebá. Maibé la’os ida ne’e mak atu rezolve problema iha kapitál”, dehan Deputadu Bankada FRETILIN, Fancisco Miranda Branco, iha Um Fukun PN, Segunda (18/3).
Nia dehan, respeita tomak ba figura maun boot Xanan Gusmão, maibé se hakarak halo hanesan ne’e, di’ak liu instituisaun sira ne’e taka hotu para tuun ba luku hotu tahu no bee, nune'e ba future jerasaun sira lalika iha instituisaun, maibé tuun ba luku hotu tahu no bee de’it.
“Iha sistema para halo buat sira ne’e. Lalika halo populizmu hodi ba tahu laran. Ita iha sistema, sistema funsiona ho responde ba buat ida, tanba iha faze luta, buat seluk iha faze konstrusaun”, tenik Branco.
Entretantu deputada Virgina Ana Belo, husi Bankada CNRT dehan, buat ne’ebé maun boot Xanan halo ne’e la’os foin halo, maibé halo ne’e iha tempu sei primeiru ministru halo tiha ona.
