Ministru ne’e hatete, atu nomeia figura ida troka Xanana depende ba tekniku sira bazeia ba nesesidade negosiasaun nian.

"Atu troka Xanana Gusmão, ha’u hanoin ne'e tenke haree ba nesesidade, iha ona ema ou lae depende ba nesesidade, orsida ita-nia Timor Gap ho parseiru ne'ebé serbisu hamutuk hala'o serbisu presiza ema atu halo negósiu, entaun depende tekniku sira mak hato'o mai governu par bele hili ema," dehan nia hafoin hasoru-malu ho Primeiru Ministru Taur Matan Ruak iha palasiu governu, Kinta (23/07).

Tuir nia, prosesu negosiasaun sei la'o hela, tanba situasaun Covid-19 mak paradu, maibé bainhira situasaun normal ona, sei kontinua nafatin.

Kona-ba negosiasaun Greater Sunrise, Victor hatete, fahe ba rezime rua, sorin 70 ka 80 pursentu Timor-Leste nian, no sorin 20 ka 30 pursentu Australia nian.

"Agora kestaun mak oinsa interese nasaun rua ne'e tau hamutuk par bele atu rezime ida de'it mak regula, ida ne'e mak tekniku sira sei para, seidauk halo negósiasaun, tanba situasaun Covid-19, maibé tekniku sira sei tuur hamutuk par deskute fali atu oinsa rezime rua ne'e halo sai ida de'it hodi regula sira halo dezenvolvimentu," nia esplika

Nia hatutan, kestaun ne'ebé dadaun sei iha prosesu mak negósiasaun serbisu tekniku iha projetu tasi mane.

"Projetu tasi mane tuir ha’u-nia hanoin ne'e kestaun teknika negósiu entre empreza Timor Gap ho empreza ne'ebé atu serbisu hamutuk. Purtantu, ne'e ha’u hanoin kuandu empreza rua ne'e sei iha konfiansa hamutuk atu serbisu hamutuk hanoin laiha problema."

Entertantu, Kay Rala Xanana Gusmão deside rezigna an husi kargu Xefe Negósiador Delimitasaun Fronteira Maritima iha 9 Juñu 2020.