Print this page

Governu TL-UE Diskute Implementasaun Reformada Setór Tolu

Ministra Negósiu Estranjeiru no Koperasaun (MNEK) Adaljiza Magno ko'alia hela ba jornalista sira hafoin reuniaun Konsellu Ministru iha palasiu governu, kurta (22/07). Ministra Negósiu Estranjeiru no Koperasaun (MNEK) Adaljiza Magno ko'alia hela ba jornalista sira hafoin reuniaun Konsellu Ministru iha palasiu governu, kurta (22/07). Foto Tempo Timor

Tempotimor (Dili) - Governu Timor-Leste liuhosi Ministériu Negósiu Estranjeiru no Kooperasaun (MNEK), Ministériu Finansas (MF), Ministériu Administrasaun Estatál (MAE), no Ministériu Saúde hamutuk ho Uniaun Europeia (UE) realiza diálogu polítika kona-ba apoiu implementasaun reforma estratéjiku setór jestaun finansas públika, nutrisaun, dekonsentrasaun no desentralizasaun.

Ministra Negósiu Estranjeiru no Kooperasaun (MNEK), Adaljiza Magno hateten, diálogu polítika ne'ebé realiza atu bele halo avaliasaun ba implementasaun polítika iha área setoriál tolu, atu bele identifika obstakulu sira no rona mós perspetiva husi parseiru sira, inklui sosiedade Sivíl.

"Diálogu ne'e sai hanesan oportunidade atu permite diskusaun kona-ba polítika setoriál sira ne'ebé promove reforma ba dezenvolvimentu sustentável, liuhusi sasukat efisiénsia, integridade, transparénsia no responsabilidade," dehan nia, hafoin abertura diálogu polítika, iha Ministériu Finansas, Ai-Tarak Laran, (23/7).

Nia dehan, iha primeira reuniaun ba diálogu polítiku ne'e, atu ko'alia kona-ba apoiu orsamentu husi Uniaun Europeia ba polítika governu nian hodi hametin jestaun finansas públika, polítika nutrisaun, no polítika ba desentralizasaun.

Governu TL hetan fundu tokon US$ 7,6 husi Uniaun Europeia iha ámbitu implementasaun reforma estratéjika ba setór finansas públika, nutrisaun, dekonsentrasaun no desentralizasaun.

Iha fatin hanesan, Embaixadór Uniaun Europeia, Andrew Jacobs hateten, Uniaun Europeia afavór ba apoiu orsamentu hanesan modalidade apoiu ne'ebé garante kualkér tempu.

"Implementasaun iha Timor-Leste ne'e hanesan rekoñesimentu ida husi Uniaun Europeia nia konfiansa ba sistema governasaun no maturidade parseria entre Timor-Leste ho ami", tenik nia.

Nia dehan, fundu husi apoiu orsamentu ne'e sei halo pagamentu bainhira hatudu progresu ba implementasaun polítika reforma sira no indikadór sira ne'ebé sai hanesan sasukat ba pagamentu ne’e konkorda antes ona entre TL ho UE. (*)  

Rate this item
(0 votes)
Last modified on Thursday, 23 July 2020 22:06
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items