Diskusaun votasaun finál globál ba projetu lei MPKK numeru 1/V (la) ne'e aprezenta husi Komisaun A PN ho totál artigu hamutuk 118.
Prezidente Parlamentu Nasional (PN), Aniceto Guterres hatete, aprovasaun finál globál ba Medida Prevensaun no Kombate Korrupsaun ne'e nu'udar rohan ona husi debate Lei Anti Korrupsaun.
"Tanba ne'e, sei fó fila ba Komisaun A atu bele prepara iha redasauan finál globál atu bele lori ba Xefe Estadu hodi hetan promulgasaun," dehan nia, hafoin remata votasuan finál globál, iha plenária PN, Segunda (20/7).
Iha fatin hanesan, Deputadu Bankada PLP, Abel Pires hatete, apresia ba komisauan A ne'ebe konsege lori Lei Anti Korrupsaun mai Parlamentu Nasionál.
Nia admira, bainhira lei ne'e trata durante tinan naruk laiha rezultadu, maibé iha lejizlatura ne'e bele halo. Tanba ne'e, importante tebes atu bele hatudu ba públiku katak Timor-Leste iha lei kona-ba medida prevensaun ba kombate korrupsaun.
Iha fatin hanesan, Deputadu Bankada PD, Mariano Assanami Sabino hatete, Lei MPKK ne'ebé PN aprova ne'e di'ak tebes atu lori ba oin nune'e bele eduka no evita ba sidadaun Timor sira ne'ebé foti ninia riku soin rasik.
Nune'e, Deputadu Bankada FRETILIN, António Bianco, louva ba lei ne'e maski deputadu anteriór sira lori kleur debate lei ne'e, maibé afinal deputadu sira agora aprova hotu iha tempu ne'ebé lalais liu.
"Maibé ita servisu seidauk hotu, tanba ita sei haree partisipasauan implmentadór sira ne'ebe atu implementa lei ne'e tenke justifika lia loos," dehan nia.
Deputadu Bankada CNRT, Patrocino Fernandes haten, rezultadu diskusaun ne'e la mai husi bankada ida, maibe bankada hotu iha komisuan A mak finaliza debate ne'e.
"La'ós buat foun mak ita introdús iha lei ne'e tanba husi lei ne'e maioria ita foti fali artigu barak husi kódigu penál," dehan nia.
Tanba ne'e, CNRT hakarak husu ba KAK kumpre ezijénsia no labele halo milagre de'it, maibé tenke hanoin oinsá mak lei ne'e labele sai fali difikuldade. (*)