Iha Segunda (20/07), MAPKomS fasilita dialogu daruak ho petisionariu sira hodi bele hetan solusaun ba problema ne’ebé iha, maibé seidauk hetan solusaun.
Ba kestaun ne’e, Ministru Jeronimo hatete, dialogu daruak no ikus ne’e parte hotu-hotu rekoñese katak iha buat balun sala.
"Maibé parte petisionáriu sei hakarak dehan katak sira hakarak ba hasoru lai ho sira-nia kolega sira depois sira sei haruka karta ida ba ha’u, saída mak pozisaun sira nian, maibé atu halo tan diálogu laiha ona, remata ona, no hein de’it ona pozisaun husi parte petisionáriu nian,” dehan Ministru Jeronimo iha palasiu governu.
Nia dehan, Konsellu Imprensa no sira seluk laiha problema, sira hein de’it.
“Agora husi parte petisionáriu sei husu fali tempu tan, sira ba hasoru malu ho nia kolega sira ne’ebé mak assina petisaun, atu nunee, ikus mai sira foti desizaun ida hodi haruka karta ida mai fó hatene sira hakarak kontinua ba tribunal ka ba parte ne'ebé kompetente ka remata ona iha enkontru ida ohin.”
"Entaun, kerdijer ke desizaun mak ne'e ona, i haree fali ba oin saída mak atu bele halo. Tanba sira ohin dehan ba ami hotu katak sira na’in haat de’it mak mai, entaun sira hakarak fila ba halibur malu tiha lai depois sira haruka karta ofisial ida mai MAPKomS ho KI hodi informa katak saida mak sira-nia pozisaun,” dehan nia.
Iha fatin hanesan, portavoz petisionariu, Nomeio Falcão hatete, nia parte sei ba hasoru-malu ho nia maluk petisionariu sira molok deside pozisaun.