Bazeia ba relatóriu Asosiasaun HAK nian iha tinan 2019, komunidade sira ne'ebé hela iha kapitál Dili iha suku 7, aldeia 61 ho totál uma-ka'in hamutuk 13.660. Husi uma-ka'in sira ne'e, uma-ka'in rihun 1.754 mak seidauk asesu bee moos no kontinua hemu bee mota no uma-ka'in sira ne'ebé konsumu bee posu hamutuk 265.

Nia dehan, komunidade barak seidauk asesu bee moos, tanba atetude husi komunidade seluk ne'ebé la di'ak.

"Atetude komunidade nian tanba haree katak iha komunidade barak maka sira uza dump, entaun dada tiha bee kanalizasaun sira ne'ebé governu fornese, ikus mai komunidade sira ne'ebé hela iha kotuk la hetan bee," dehan Jestór Programa HAK, Adélio da Costa ba jornalista sira iha nia knaar fatin Faról, Segunda (20/07).

Nia akresenta, komunidade sira labele asesu bee kanalizasaun, entaun sira barak maka konsumu bee posu, maibé tuir dekreitu lei númeru 4/2004, bandu tanba bee ne'ebé iha rai okos ne'e, Estadu mak na'in. Maibé ema barak no mós kompañia barak maka uza hela bee.

“Iha suku 57, aldeia 349, uma-ka'in 34.391 mak asesu ona bee kanalizasaun, maibé uma-ka'in ida ne'ebé asesu bee mota nee iha 3.466, entretantu komunidade ne'ebé konsumu bee posu ka uza dump iha munisípiu Vikeke, Baukau, Likisá no Dili hamutuk 3.447.

Dadus hirak ne'e HAK iha tinan 2019 submete ona ba Parlamentu Nasionál (PN), maibé alokasaun orsamentu ba MMinistériu Obras Públika (MOP), liuliu parte SAS hetan 1.3% husi total OJE. (*)