Porta-vós AUTL, Moises Magno hatete, iha problema pandemia Covid-19 governu foti desizaun politika fó subsídiu ba estudante timoroan iha rai liur ho razaun nesesidade finanseira depende ba rendimentu familiár iha Timor-Leste.

Ba apoiu ida ne'e, nia konsidera governu halo ona diskriminativu ba estudante universitáriu  iha rai-laran.

Tanba tuir-nia, inplementasaun estadu emerjensia  ne'ebe Timor-Leste kria hodi prevene pandemia Covid-19 durante fulan tolu, difikulta mós estudante iha Timor-Leste  hasoru krize finanseira.

Maiske estudante sira iha Timor-Leste hasoru krize finanseira hirak ne'e maibé governu la preokupa.

Ne'e duni, nia husu ba Govemu atu kria mós desizaun polítika ida hodi fasilita estudante iha rai-laran tanba estudante hirak ne'e maioria husi povu ai-leba nia-oan.

Kona-ba ajuda estudante iha rai-laran, nia fó hanoin, di'ak liu governu kria desizaun politika oinsa fó livre propinas semester ba estudante rai-laran, iha tinan akadémiku 2020 nian.

Maibé, nia dehan, bainhira Governu Timor-Leste lakohi kria desizaun polítika ba estudante universidade iha rai-laran maka AUTL sei kria manifestasaun hasoru governu, liuliu Ministériu Ensinu Superiór, Siénsia no Kultura.

"Tanba governu favorese de’it ba estudante sira ne’ebé hala'o estudu iha rai-li'ur no la preokupa ho povu nia oan sira ne’ebé estuda iha rai-laran, maske enfrenta liu krize ekonómika," katak Porta-vós.

Entertantu, estudante Universitáriu ne'ebe forma AUTL ne'e kompostu husi UNPAZ, UNTL, UNDIL, UNITAL, IOB, DIT, ICS no ISC. (*)