PN Husu Lere Aprezenta Proposta Pensaun Vitalisia Ba Veteranu

Xefe Komisaun A Parlamentu Nasional, Joaquin dos Santos Borluli ko'alia ba jornalista sira iha resintu Parlamentu Nasional Xefe Komisaun A Parlamentu Nasional, Joaquin dos Santos Borluli ko'alia ba jornalista sira iha resintu Parlamentu Nasional Foto Tempo Timor

Tempotimor (Dili) - Prezidente Komisaun A Parlamentu Nasionál, Joaquim dos Santos, husu ba Xefe Estadu Maiór Jenerál F-FDTL, Majór Jeneral Lere Anan Timur, labele ezije de'it kona-ba lei pensaun vitalisia ba veteranu, maibe tenke aprezenta proposta.

Nia hato'o lia hirak ne'e hodi responde ba preokusau Xefe Estadu Maiór Jenerál F-FDTL  relasiona ho lei pensaun vitalisia ba veteranu.

Tuir nia, atu kria lei ida presiza aprezenta proposta ruma atu nune'e politiku na'in sira mós bele haree atu diskute.

"Kuandu lei ne'e mak ita ezije de'it ne'e sei laiha solusaun, tanba ne'e karik lei pensaun vitalisia ba veteranu sira maka importante no prioridade, tenke aprezenta proposta ruma kona-ba ida ne'e," dehan Deputadu Joaquim, iha Parlamentu Nasionál, Kinta (16/7).

Nia hatutan, karik iha duvida ruma kona-ba lei pensaun vitalisia ne'e, entaun bele halo koordenasaun ho parte órgaun sira hodi bele hadi'a pensaun vitalisia ne'ebe antes ne'e iha ona.

Antes ne'e, Xefe Estadu Maiór Jenerál F-FDTL, Majór Jenerál Lere Anan Timur, husu atu kansela sira-nia pensaun vitalísia ba deputadu Parlamentu Nasionál V Lejizlatura.

“Sira iha Parlamentu Nasionál ne’ebá hein tinan lima hotu para sira simu sira-nia pensaun vitalísia ke sira ne’e laiha direitu, ha’u bele dehan sira laiha direitu, inklui lei ne’e mós halo sabraut hela,” dehan nia, iha Palásiu Prezidensiál, Bairru-Pité, Kuarta (15/07).

“Tanba saida mak ami luta tinan 24 laiha pensaun vetalisia, to’o ha’u-nia katuas sira reforma ne’e ko’a tan ninia osan, manan tan dolar $110 kada fulan, ne’e morál laiha,” dehan Lere.

Tuir nia, koresponde ba situasaun atuál, la’ós ba hein Pensaun Vitalisia to’o tinan lima para sosa kareta foun.

Lere promote, sei ejize ba PN hodi kria mós lei pensaun vitalísia ba veteranu sira.

“Ami hanesan veteranu, ami mós hakarak ejize ba Parlamentu Nasionál hodi halo lei ba ami-nia pensaun tinan 24, la’ós tinan lima,” nia promote. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.