Ministru Franscisco Jerónimo hateten, reprezenta husi petinariu sira mai atu ko’alia kona-ba sira-nia hanoin ne’ebé sira hakerek iha sira-nia petisaun laran, tanba petisaun ne’e sira hakarak haree fila-fali prosesu ne’e hotu liuliu kona-ba Lei Komunikasaun Sosiál iha númeru 5/2014, ne’ebé ko’alia kona-na prosedur.

“Ohin ami hasoru malu ha’u ko’alia ba sira no sira mos konkorda katak hasoru malu ho parte petinariu, Konselu Imprensa no Assosiaun Jornalista Timor-Leste (AJTL) hodi haree fila-fali. Simu ka la simu ne’e depende ba rezultadu diálogu ninian”, dehan ministru, ba grupu petisionáriu m, iha Gabinete MAPKomS, Kinta (16/7).

Nia hatutan, politíka parlamentu atu fó pose ka lae ne’e kompetensia Prezidente Parlamentu Nasional ninian. Hanesan ministériu ne’ebé tutela ba órgaun komunikasaun sosiál fasilita enkontru entre parte rua atu haree fila-fali  solusaun ne'ebé di'ak liu, tanba diálogu ne’e mak sai xave antes atu hakat ba iha prosesu sira seluk.

"Buat ne’ebé importante maka hanesan jornalista hotu-hotu hakarak kontribui, karik iha erru ruma ne’ebé akontese ita presiza hadi'a atu labele akontese tan iha futuru," tenik nia.

Nia dehan, atu labele halo ema komplika nia hamoin, ministru sei husu Konsellu Imprensa atu dada hikas Lei Komunikasaun iha lian Tetun tanba tradusaun la hanesan ho Portugues ne'ebé hamosu fali interpretasaun oioin.

Iha fatin hanesan, Noemio Falcão, Koordenador Petisionáriu hateten, petisaun ne’e halo tanba konstitusaun fó dalan bele ezerse ninia diretu.

"Ami hato’o ba Tribunál Rekursu tanba liga ho lei, iha Parlamentu Nasionál tanba lei Komunikasaun Sosiál hatete iha kompetensia atu fó tomada-de-pose ba sira (membru Konsellu Imprensa) na'in lima. (*)