Motorizada ne'e utiliza husi diretór ida, maibé tanba pesoál ne’ebé utiliza laiha vontade maka ekipa konjunta tuun hodi foti diretamente.

“Ohin dadeer mai foti motorizada ida iha MAE atu lori fila-fali ba patrimóniu estadu para haree fila-fali dadus sira ne’e, para utilizasaun ne’e ba duni objetivu sira ne’ebé iha,” dehan Portavós ekipa konjunta, hanesan mós pontu vokál KAK, Euclides Vidal Madeira, ba jornalista sira, iha edifísiu MAE, Kaikoli, Sesta (17/07).

Fontes ne’e dehan, motorizada ne'e halo ona aproximasaun ho pesoál ne’ebé utiliza durante tinan ida, maibé laiha kooperasaun maka ekipa konjunta tuun hodi foti diretamente.

“Ami rona katak diretór ida mak uza motór ne’e no la lori mai iha edifísiu, halo aprosimasaun kleur ona husi Patrimoniu Estadu no lojítika MAE nian, maibé komu laiha vontade di’ak para entrega, entaun ohin obrigatoriamente ami ekipa husi Komisaun Anti Korupsaun (KAK), Polísia Nasionál Timor Leste (PNTL) no Patrimóniu Estadu (PE), mai foti motorizada ne’e,” nia dehan.

Nia dehan, servisu ne'e la’ós foin hahú, maibé kontinua servisu ne’ebé hala’o ona iha fulan kotuk. La’ós iha MAE de’it, maibé iha mós ministériu seluk ne’ebé lista sira tama ona iha PE, ne’ebé hein para ekipa tuun hodi rekolla hotu patrimóniu sira ne’ebé pesoál sira uza la tuir nia dalan.

Nia mós apelu ba pesoál utilizadór sira atu kolabora, bainhira hetan xamadu ruma husi parte relevante.

“Apelu ba funsionáriu, kargu diretór no xefia sira ne’ebé utiliza patrimóniu estadu, atu konxiente no koopera di’ak ho instituisaun estadu sira para ho voluntariamente hodi entrega de’it kuandu hetan xamada husi parte kompetente. Tanba lista lubuk ida ona mak iha PE, ne’ebé ekipa konjunta ba rekolla,” tenik nia.

Entretantu, relasiona ho ekipa konjunta husi KAK, PNTL no PE foti motorixada ho xapa tarikula 2129 GA ne’e, tempotimor.com koko konfirma ho Diretór Finansas Patrimóniu Estadu (DFPR) husi MAE nian, Egidio de Jesus Alves, maibé nia parte lakohi fó komentáriu tanba dadus seidauk fornese ba nia.