Ángela Freitas Ameasa Xefe Estadu

Grupu ne'ebe deklara defende Konstituisaun halo konferensia de imprensa hodi taka estrada (17/7) Grupu ne'ebe deklara defende Konstituisaun halo konferensia de imprensa hodi taka estrada (17/7) Foto Tempo Timor

Tempotimor (Dili) - Porta-vós grupu Rezistensia Nasional Defende Justisa Konstituisaun RDTL, Angela Freitas, ameasa Xefe Estadu atu fó resposta ba sira-nia petisaun no rezigna-aan.

Nia dehan, Prezidente Repúblika tenke iha responsablidade morál atu rezigna-aan tanba ukun la tuir regra demokrasia, se lakohi tun mak RNDJK sei mobiliza massa halo asaun.

"Se ami hato'o petisaun ba Prezidente Repúblika laiha resposta mak povu sei tuun halo demonstrasaun. Tanba ne'e, Prezidente Repúblika tenke iha responsablidade morál atu rezigna-aan tanba ne'e ezijénsia povu nian", dehan nia, hafoin konsentra massa, iha sede RNDJK, Formosa, Sesta (17/7).

Nia husu, Prezidente Repúblika, Francisco Guterres Lú Olo tenke rezigna-an atu rezolve impase polítika iha rai-laran.

"Prezidente Repúblika lalika halo kolen povu, di'ak liu tun mai rezigna-aan hodi entrega fila-fali podér ba povu tanba, povu mak sei determina tanba people power ne'e ita bele dehan katak eleisaun direita povu mak atu determina ukun ne'e atu entrega ba sé, atu nune'e ita bele hadi'a buat ne'ebe naksala", tenik nia.

Ángela afirma, iha nasaun demokrasia kuandu ukun la tuir regra tenke rezigna-aan hodi fó fali ba povu hodi deside. 

"Ita hotu akompana iha mundu país Demokrátiku no avansadu kuandu povu tun eziji laiha tan ema ida atu dehan nia lakohi tun, sé de'it mak kuandu ukun rai ne'e la tuir regra demokrasia, la kumpre konstituisaun nia tenke tuun", tenik nia.

Tuir observasaun tempotimor.com iha terenu, fatin konsentrasaun masa iha rezidénsia Ángela Freitas nian seguransa másimu husi Polisia Nasionál Timor-Leste (PNTL) no taka estrada iha Sentru Saúde Formosa nia oin. (*)

Rate this item
(3 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.