Print this page

Lere: Iha Futuru, Hakarak sai Deputadu Aprende Uluk Baku-malu

Major Jeneral Lere Anan Timur ko'alia ba midia hafoin sorumutuk ho Prezidente da Republika, Dr. Francisco Guterres Lu Olo iha palasiu Prezidensial Dili (15/7) Major Jeneral Lere Anan Timur ko'alia ba midia hafoin sorumutuk ho Prezidente da Republika, Dr. Francisco Guterres Lu Olo iha palasiu Prezidensial Dili (15/7) Foto Midia PR

Tempotimor (Dili)-Xefe Estadu Maior FALINTIL Forsa Defeza Timor-Leste (F-FDTL) Maijor Jeneral Lere Anan Timur hasai lia-fuan sátira ida ba aktu deputadu sira iha Parlamentu Nasionál (PN).

Tuir Lere, bainhira deputadu sira iha PN tuku malu tan, di’ak liu aban-bainrua, see mak hakarak sai deputadu presiza aprende uluk baku-malu.

“Ha’u horseik rona katak deputadu sira iha PN atu tuku malu tán, entaun ha’u mós hanoin katak aban-bainrua atu sai deputadu, tenke hatene karate, taekwondo par bele sai deputadu, se la hatene, ne’e nia han ona,” dehan Lere ba jornalista sira hafoin ekontru semanál ho Prezidente Repúblika (PR) Francisco Guterres Lu Olo, iha Palásiu Prezidensiál Bairru-pite, Dili, Kuarta (15/07).

Aleinde aprende baku-malu, Lere hatete tan, presiza mós harii meza no kadeira iha PN ho todan tonelada ida atu nune’e deputadu sira labele baku fila.

“Aban-bainrua mós PN tenke estuda no halo meza ida ne’ebé ke todan tonelada ida ba leten par ema labele baku fila, se meza kaman, ema ida bulak ne’e to’o iha ne’ebá baku fila tiha meza,” dehan Lere.

Maske hasai lian sátira ne’e, maibé Lere mós hato’o ninia pozisaun katak, bainhira deputadu sira kontinua provoka malu hodi baku malu, F-FDTL sei hola pozisaun.

“Deputadu sira iha PN ne’ebá ne’e atu defende interese povu nian, maibé se manggame nafatin, ami mós loron ida sei toma pozisaun ida ne’ebé dala-ruma imi la gosta, mais ami tenke toma, tanba ne’e demais ona, demais ona, iha PN ne’ebá la’ós par atu soran ema, fahe ema, ne’ebá atu deskute kona-ba destinu nasaun no povu nian,” deklara nia.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items