Dala Ida Tan, Deputadu 'Hakoak Meza' Halo Tan Problema iha Plenária

Hafoin deputadu sira harahun Meza Prezidente Parlamentu Nasional iha loron 19 fulan Maiu Tinan ne'e Hafoin deputadu sira harahun Meza Prezidente Parlamentu Nasional iha loron 19 fulan Maiu Tinan ne'e Foto Suplai

Tempotimor (Dili) - Mosu fali ona problema iha Parlamentu Nasionál. Ema ne'ebé envolve iha kazu ne'e la'ós jogador foun, maibé husi deputadu 'hako'ak meza' ne'ebé antes ne'e sai autór ba Meza Prezidente PN rahun. 


Deputadu ne'ebé mensiona maka José Virgílio husi Bankada CNRT. Antes ne'e, Meza Parlamentu Nasionál rahun tanba deputadu ne'e hakoak metin meza hodi la fó fatin ba Vise-Prezidente PN sira atu derije sesaun plenária.

Situasaun hanesan atu akontese fali bainhira deputadu sira fó sira-nia argumentu iha Parlamentu Nasionál.

Deputadu David Dias Mandati husi Bankada FRETILIN deklara katak, membru CNRT barak mak subar hela iha Xanana Gusmão nia kalilin okos.

La simu deklarasaun ne'e, deputadu 'hakoak meza' Jose Virgílio, hatudu forsa no hatudu liman ba Deputadu Mandati, maibé situasaun ne'e konsege normaliza hafoin membru PN sira ba hakalma na'in rua ne'e.

Kauza husi atitude ne'e, diskusaun ba votasaun finál globál Lei Anti Korrupsaun (LAK) ne'ebé altera ona ba Medida Prevensaun no Kombate Korrupsaun (MPKK) tenke hapara no adia fali ba tempu seluk.

Vise-Prezidente Parlamentu Nasionál, Maria Angélina Sarmento ne'ebé prezide sesaun ne'e tenke adia loron diskusaun ba tempu seluk, tanba reprezentante povu sira ne'e haklalak iha plenária laran.

Vise-Prezidente PN hateten, plenária la konsege diskute no aprova Medida Prevensaun no Kombate Korrupsaun finál globál, tanba deputadu sira iha plenária hatudu fali sira-nia emosaun hodi istória malu.

"Meza ensera plenária tanba ita-boot (deputadu) sira laiha dixiplina. Ami mós sei muda ajenda debate Lei Anti Korrupsaun ba loron seluk," dehan nia, hodi taka sensaun plenária, Tersa (14/7).

Nia dehan, atu ajenda hikas ba debate Lei Anti Korrupsaun ne'e tenke hetan autorizasaun husi Prezidente PN.

Situasaun hanesan la'ós foin primeira-vés iha Uma Fukun Parlamentu Nasionál, deputadu sira halo beibeik hahalok imorál ne'e bainhira iha plenária.

Antes ne'e, deputadu sira mós 'hako'ak' no harahun meza Prezidente PN tanba diverjénsia hanoin. (*)

Rate this item
(5 votes)
Last modified on Tuesday, 14 July 2020 22:13
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.