Tempotimor (Dili) - Ministeriu Finansas (MF) hasoru difikuldade atu halo prosesu pagamentu subsidiu suplementár remonitoria tanba Sentru Integradu Jestaun Krize (SIJK) la eziste ona.
Ministru Finansas, Fernando Hanjam hatete, SIJK la eziste ona sai hanesan difikuldade ida tanba, antes ne'e dokumentu hotu ba iha sala situasaun hodi hetan aprovasaun foin submete mai sekretariadu halo pagamentu.
"Ita-nia difikuldade maka Sala Situasaun Sentru Integradu Jestaun Krizi dezmantela ona, entaun ohin hau diskusaun ho Primeiru Ministru, mas ita-nia ekipa jurídiku sei tuur hamutuk fila-fali para haree asuntu ne'e tanba ligasaun ho legal sira", dehan nia, iha Palásiu Governu, Segunda (13/7).
Ministru hatutan, prosesu pagamentu suplementár remonitoria daudaun balun husi parte saúde, agua no saneamentu. Tanba ne'e daudaun prosesa para halo pagamentu labele komplikadu.
"Ita tenke hatene sé mak iha primeira nivel frontline no sé mak iha segundu. Agora atu hatene ida ne'e desizaun husi Sala Situasaun maibé, agora SIJK dezmantela ona, entaun ohin hau lori mai para iha solusaun ida", dehan Fernando.
Nune'e, ba kestaun hirak ne'e ekipa juridiku sei tuur hamutuk para haree solusaun ruma. (*)