Liu husi konferensia imprensa iha sede partidu Trabalhista, Angela hatete, iha PR Lu Olo ninia mandatu, nia halo violasaun maka'as ba lei inan.
Violasaun ne'e mosu, tuir Angela, liu-liu tanba PR Lu Olo deside hodi fó posse ba membru governu na'in 21 hodi kompleta estrutura governu konstitusional daualu ne'ebé lidera husi Primeiru Ministru Taur Matan Ruak.
Tan ne'e, Angela ezije ba Xefe Estadu atu rezigna an.
"Ami husu ba Prezidente Republika Francisco Guteres 'Lú Olo' atu rezigna an lalais husi kargu nu'udar xefi estadu tanba haree katak iha mandatu PR nian hamosu impase politika no halo violasaun hasoru lei inan sira tanba fó pose ba sira-nia membru governu 21 hodi halo konfuzaun povu, liu-liu la konsidera diretu umanu no hada'ukonmpetensia tribunal, sosiedade sivil, relijioza sira ," Angela deklara.
Bainhira PR Lu Olo la rezigna an, Angela ameasa atu mobiliza massa hodi halo manifestasaun kontra PR Lu Olo.
"Se karik Xefi Estadu la halo rezignasaun mak tempu badak partidu Trabalhista prontu mobilza massa hodi hala'o demostrasaun kontra Prezidente Republika," dehan nia.
Molok ne'e, Angela ameasa ona atu uza people power hodi hatuun PR Lu Olo husi nia kargu.
Angela fó razaun ne'ebé kuaze hanesan katak, PR Lu Olo halo ona violasaun grave ba konstituisaun RDTL.
Prezidente partidu Trabalhista ne'e ezije atu PR Lu Olo rezigna an.