Print this page

MAPKomS iha STL: Media Tenke Fó Informasaun Kredibel no Loos

MAPKomS, Francisco Jeronimo MAPKomS, Francisco Jeronimo Foto File

Tempotimor (Dili)-Ministru Asuntu Parlamentar no Komunikasaun Sosial (MAPKomS) Francisco Jeronimo husu ba media sira atu tenke hato’o informasaun ne’ebé kredibel no loos ba públiku.

Ministru Jeronimo hato’o kestaun ne’e bainhira hala’o vizita ba instituisaun media Suara Timor Lorosa’e (STL) hodi haree no rona direitamente difikuldade ne’ebé media sira hasoru.

Ministru Jeronimo hatete, ninia prezensa iha STL no instituisaun media sira, atu hatudu katak governu mós iha preokupasaun ba media sira.

"Ami hatene jornal hotu-hotu imparsiál, bele hato'o informasaun saida de’it bá públiku, importante mak informasaun sira ne'ebé fó sai bá ne'e kredibel, loos no ema hotu-hotu sente katak, ‘sim, ida ne'e duni mak akontese’," dehan Ministru ne’e iha edifisiu STL, Osindo, Kuarta (09/07).

Jeronimo dehan, nu’udar ministru ne’ebé tutela ba area komunikasaun sosial, nia hala’o vizita ba instituisaun media sira hodi bele hatene saida mak media sira ne’e hakarak ba rai ida ne’e.

“Hanesan governu, apresia ba ita-boot sira tanba bele hatutan lian, informasaun, notisia no saida de’it mak akontese iha rai laran ne’e ba ema hotu-hotu iha Timor laran no mós ba iha rai li’ur”.

Ministru ne’e promete, ba oin sei la’o hamutuk no koopera ho instituisaun media sira hodi dezenvolve media no informasaun iha TL.

"Ita sei lao hamutuk, sei koopera ho malu, sei haree saida mak presiza atu hadia ita sei tau hanoin hamutuk hodi bele dezenvolve média iha Timor no mós dezenvolve informasaun sira ne’ebé ita halao, atu hasai informasaun la'os ho kuantidade de’it maibé ho kualidade," dehan nia.

Iha fatin hanesan, Xefe Redasaun STL, Domingos Saldanha hatete, nu’udar media komunikasaun, STL hamriik imparsial no la tama ka sadere politika, maske nune’e STL kompriende politika.

"Ami imparsiál, ami la afavor ba partidu see de’it, ami hakarak imparsiál, professionál i hakarak di'ak ba ema hotu, maibé keta hirus ami bainhira ami kritíka,” dehan nia.

Daudauk ne’e, nia informa, funsionariu ne’ebé serbisu iha STL hamutuk na’in 62, kompostu husi jornalista na’in 35 no restu iha parte publisidade, administrasaun no seluk tan.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items