PM Taur Ho Kriminaliza Difamasaun: "Ha'u Uluk Funu Laos atu Ema Tolok"

PM Taur Matan Ruak ko'alia ba Midia hafoin sorumutuk ho PR Dr. Francisco Guterres Lu Olo iha Palasiu Prezidensial Dili (9/7) PM Taur Matan Ruak ko'alia ba Midia hafoin sorumutuk ho PR Dr. Francisco Guterres Lu Olo iha Palasiu Prezidensial Dili (9/7) Foto Midia PR

Tempotimor (Dili) Primeiru Ministru Taur Matan Ruak hatudu ninia pozisaun firme ba esbosu Lei Difamasaun ne'ebé Ministériu Justisa (MJ) inisia.

Maske la deklara klaramente ninia defeza ba Kriminaliza Difamasaun, maibé iha ninia deklarasaun PM Taur dehan uluk halo funu laos atu ema tolok arbiru iha tempu ukun rasik aan.

"Se uluk ha'u mak hatene ida ne'e, ha'u la funu par to'o ikus ema tolok arbiru, invez-de ita-nia sosiedade ne'e sai sosiedade ne'ebe sivilizadu, mais sai fali sosiedade ida ne'ebe mal edukadu no laiha respeitu," dehan PM Taur iha Palasiu Prezidensial Bairu-pite Dili, Kinta (09/07).

Tuir PM Taur, kultura no tradisaun Timor nian, la permite ema tolok no trata ema arbiru.

"Iha ita-nia tradisaun no kultura katak tolok malu, trata malu ne'e Maromak bandu, ita tama ba demokrasia tolok no trata ema ne'e, so demokrasia ida ne'e mak hanesan ne'e," nia dehan.

Xefe governu ne'e dehan, bainhira Timor-Leste  hakarak sai nasaun forte, sosiedade tenke iha respeitu.

"Sosiedade ne'e so forte bainhira iha respeitu de'it, ne'ebé husik sosiedade deskute lai lei difamasaun ne'e, ita labele kopia demokrasia hodi ko'alia arbiru. Demokrasia tuir loloos hanorin buat ne'ebé mak di'ak, maibé dala-ruma uza sala hodi insulta no trata ema."

PM Taur dehan, uluk lei difamasaun iha ona, maibé tanba halo mudansa entaun agora komesa deskute fali, tanba ema barak ko'alia demokrazia, maibé demokrasia ida ne'ebé halo ema la kompriende.

"Konstituisaun RDTL mós define kona-ba ema nia naran di'ak. Tanba ne'e esbosu kriminaliza difamasaun ne'e husik sosiedade diskute, sei lori mai Konsellu Ministru (KM) mak aprova, sei lori ba Parlamentu Nasionál (PN), ne'ebé diskusaun sei la'o," dehan nia.

Rate this item
(2 votes)
Last modified on Thursday, 09 July 2020 15:15
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.