Asuntu korrupsaun sai diskusaun manas iha Plenária Parlamentu Nasionál hafoin deputadu Bankada FRETILIN no CNRT fakar sai faktu hirak ne'ebe sira rasik komete durante iha sira-nia mandatu governasaun.
Liuhusi ajenda Plenária Parlamentu Nasional, loron Segunda (6/7), deputadu Bankada CNRT hato'o sira-nia deklarasaun hodi akuza Sekretáriu Jerál Partidu FRETILIN, Mari Alkatiri komete subornu iha primeiru Governu Konstitusionál.
Hafoin akuzasaun ne'e, deputadu Bankada FRETILIN, Alexandrino Cardoso, resposta no kestiona ukun CNRT nia hamosu irregularidade oioin hanesan eis-ministra Emília Pires no Francisco Kalbuadi ne'ebé hetan ona akuzaun husi Ministériu Publiku.
"Ita boot sira mai kestiona hela deit Alkatiri, se karik sente ho evidensia bele ba hatama keixa hasoru Alkatiri, tanba Alkatiri prontu atu ba ne'ebé de'it," dehan nia.
Nune'e, sadik Partidu CNRT atu bolu Emília Pires no Francisco Kalbuadi atu mai hataan iha tribunál, tanba to'o ohin loron tribunál hein hela sira na'in rua. (*)