Tempotimor (Dili) - Sekretariu Jeral Partidu FRETILIN, Mari Alkatiri, ohin aprezenta ona keixa kontra CPN-CNRT no ameasa atu lori Bankada Partidu CNRT iha Parlamentu Nasional ba Tribunál relasiona ho akuzasaun simu osan husi ConocoPhillips.
Ne'e duni, Bankada CNRT la ta'uk no kontinua sadik atu Alkatiri aprezenta duni keixa ba Ministeriu Públiku (MP).
"Mari uza nia direitu halo keixa hasoru CPN-CNRT, ami prontu hein de'it bainhira maka ba hataan kazu ne'e," dehan Prezidente Bankada CNRT, Duarte Nunes, ba jornalista sira, iha PN, Tersa (7/7).
Nune'e, aleinde keixa hasoru CPN-CNRT, husu mós atu keixa kontra Bankada CNRT iha Parlamentu Nasionál.
"Se karik Alkatiri hakarak halo keixa hasoru tan Bankada CNRT iha Parlamentu ami mós prontu no ami hein hela ida ne'e duni," dehan Duarte.
Nia afirma, daudauk ne'e Bankada CNRT seidauk bele halo keixa hasoru Alkatiri, maibe akompaña de'it kazu ida agora, karik posibilidade maka Bankada CNRT foin deside hato'o keixa ba MP. (*)