Sekretariu Estadu Arte no Kultura (SEAK), Teofilo Caldas hatete, antes governu atu entrega fatin Arte Moris ba CCLN sei buka fali fatin seluk ba sira hodi kontinua sira-nia kriatividade.
"Iha fatin neeba grupu Arte Moris inklui xefe família na'in 16 mak iha hela hotu iha ne'ebá maibé, ida ne'e kestaun tékniku depois mak ministériu sira koordena malu," dehan nia, hafoin hasoru-malu ho Primeiru Ministru, Taur Matan Ruak, iha Palasiu Governu, Tersa (7/7).
Kona-ba legalidade fatin Arte Moris katak, loos duni fatin ne'e grupu Akademia Arte Industria Kriativu Kultural maibé, sei koordena didi'ak para bele fasilita malu.
"Ohin Primeiru Ministru bolu hau mai para atu desidi fatin ne'e atribui ba CCLN no ohin ami konkorda tanba ita hakarak fasilita malu hotu-hotu iha fatin ka espasu para bele halo servisu", tenik Nia.
Nia dehan, presiza konsidera duni buka fatin ba CCLN tanba, sira luta durante tinan 24 no agora forma CCLN fatin laiha atu halo servisu ho nune'e tenke fasilita malu.
Kestaun fatin ne'e Sekretariu Estadu Arte no Kultura (SEAK) mos aseita ona desizaun Primeiru Ministru, Taur Matan Ruak, nian ne'ebe atu entrega fali fatin Arte Moris ba CCLN no buka fali fatin seluk ba grupu Arte Moris.
"Ami hakruk no konkorda desizaun ne'ebé Primeiru Ministru ho Prezidente Republika foti", dehan nia. (*)