"Ne'e primeira keixa kontra CPN partidu CNRT nian, loron hira mai tan, sei keixa kontra bankada CNRT, loron hira mai tan sei keixa kontra sidadaun na'in haat, maibé ha'u lakohi temi naran, i liu ida ne'e tan sei mai kontra média balun, agora ha'u la para, ha'u sei la para," dehan Marí Alkatiri ba jornista sira iha MP hafoin aprezenta keixa ba PJR kontra CPN partidu CNRT nian, Tersa (07/07)
MA mós afirma katak, hanesan sidadaun, pasiénsia durante tinan 50 ona, maibé nia parte sente Timoroan balun ezklui nia maka'as ona.
"Ha'u hakarak hatete katak ha'u pasiensia durante tinan limanulu ona, dezde ha'u luta ba povu ida ne'e, maibé ikus ne'e maluk Timor oan balun komesa diskrimina ha'u ona, entaun ha'u pasiénsia tinan 50 ona, komu ha'u haree hanesan buat ne'e komesa boot ba bei-beik, entaun hanoin katak tempu to'o ona hatudu ba maluk sira katak labele abuza demais ona ha'u nia pasiénsia, tanba lei iha, estadu tenke funsiona, justisa tenke la'o," dehan MA.
Entretantu Marí mós dehan, akuzasaun hotu mak iha prova, tenke prova iha MP, labele hatene akuza de'it.
"Se prova iha, lori mai prova iha ne'e, se laiha prova tenke responsabliza, la'ós akuza, akuza de'it, depois uza média oioin halo akuzasaun," nia dehan
MA konsidera CNRT hahu nakdedar nune'e sira la'os ba keixa maibe dezafia MA aprezenta keixa kontra kompania.
"Sira mak akuza ha'u depois sira mai dezafia tan ha'u, se sira akuza ha'u, sira lori keixa mai iha ne'e, la'ós sira mai dezafia fali ha'u, ne'e ko'alia ibun mak boot de'it, tanba komesa nakdedar ona, hanoin la hetan mai dezafia fali ha'u," dehan MA.