Opozisaum Dehan PPN Ilegál, Aniceto : 'CNRT' Kakutak Anarkizmu

PPN Aniceto Longunhos Guterres Lopes, ko'alia ba jornalista sira hafoin hasoru malu ho Prezidente da Republika, Dr. Francisco Guterres Lu Olo iha Palasiu Prezidensial Dili (01/7) PPN Aniceto Longunhos Guterres Lopes, ko'alia ba jornalista sira hafoin hasoru malu ho Prezidente da Republika, Dr. Francisco Guterres Lu Olo iha Palasiu Prezidensial Dili (01/7) Foto Midia PR

Tempotimor (Dili)-Relasiona ho deklarasaun bankada parlamentár opozisaun, Kongresu Nasionál Rekonstrusaun Timor (CNRT-sigla Portuges) ne’ebé to’o agora konsidera meza Parlamentu Nasionál (PN) nafatin ilegál, Prezidente Parlamentu Nasionál (PPN) Aniceto Longunhos Guterres Lopes dezafia CNRT pronto atu esplika mós sasukat sira ne’ebé sira haree katak PPN Aniceto ilegál no governu defaktu. Se karik la esplika maka PPN ne'e alega CNRT nakonu ho kakutak anarkizmu.

“Iha K-RDTL ne’e hatete, tribunal mak iha kompeténsia atu hola desizaun ikus ba asuntu ne’ebé mak iha kestaun. Tribunal de’it dehan ne’e laiha ilegalidade, laiha inkonstituisionalidade, entaun ita atu fiar ba iha ida ne’ebé, ne’e ema sira ne’ebé mak kakutak anarkizmu nian mak sempre hanoin hanesan ne’e,” dehan PPN Aniceto Longunhos Guterres Lopes ba jornalista sira iha Palásiu Prezidensiál Bairru-pite Dili, Kuarta (01/07).

 Nia afirma, bele la gosta ema seluk mak manan, maibé labele dehan la vale.

“Laiha buat ida, kala to’o 2023 ka to’o eleisaun foun ruma mai ha’u ilegál mós ha’u la hola ba lia, maibé sira mós tenke esplika illegal ne’e haree husi sasukat ne’ebé no defaktu ne’e iha ne’ebé,” Nia afirma.

Nia mós husu ba bankada CNRT atu hatene esplika mós ilegál ne’e.

“Sasukat ida legál, ida ilegál ne’e iha ne’ebé, sira mós tenke hatene esplika, labele tanba tuir ita-nia gostu, labele tanba ita la aseita entaun buat hotu ne’ebé la tuir ita-nia hakarak no polítika ne’e ilegál hotu, mais iha estadu ne’e dehan ita hotu hakruuk ba konstituisaun, tanba estadu ne’e hari’i iha konstituisaun nia leten,” dehan Aniceto.

Nia afirma, iha konstituisaun katak tribunal mak iha kompetésnia atu deside ba asunte ne’ebé iha kestaun.

“Iha estadu ida iha órgaun haat, órgaun tribunal mak hola desizaun ikus ba kestaun legalidade no konstituisionalidade ne’e, it abele la gosta, maibé labele dehan ida ne’e la vale, ne’ebé ida ne’ebá ilegál nafatin, mais tenke hatene esplika, tanba se lae ita hanorin povu ne’e atu sai anarkizmu iha rai ne’e,”dehan Aniceto.

PPN ne’e afirma, bele uza linguajem polítika saida de’it, maibé tenke prontu atu simu nia konsekuénsia no tenke hatene esplika, para ita hanoin fali povu ne’e dehan labele tuir lei no sistema sira, pois ita orienta povu ne’e para atu halo de’it anarkizmu, lalika kumpri lei sira.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.