MAE-MSSI Rejista Reklamasaun Liu Rihun 11

Ministru Administrasaun Estatál (MAE) Miguel Pereira de Carvalho iha nia serbisu fatin Ministru Administrasaun Estatál (MAE) Miguel Pereira de Carvalho iha nia serbisu fatin Foto Midia MAE

Tempotimor (Dili)- Ministru Administrasaun Estatál (MAE) Miguel Pereira de Carvalho anunsia katak, durante prosesu pagamentu subsídiu $100 ba benefisiáriu iha teritóriu nasionál, Ministériu Solidariedade Sosiál no Inkluzaun (MSSI) rejista kazu reklamasaun liu rihun 11.

"MSSI ne'ebé publika ona dadus pagamentu sira, hatudu katak to'o agora ekipa MSSI ne'ebé tuun hodi halo pagamentu, pelumenus rejista ona kazu reklamasaun hamutuk liu rihun 11," Miguel ko’alia ba tempotimor.com iha Sentru Konvensoins Dili (CCD) hafoin partisipa serimónia tranzisaun responsabilidade SIJK nian ba MS, Tersa (30/06).

Governante ne'e afirma, reklamasaun sira ne'e, ekipa pagamentu husi sidadaun sira ne'ebé naran la sai iha dadus ne'ebé antes ne'e MSSI publika ona.

"Reklamasaun sira ne'e, sira simu, bainhira komunidade sira hakat ba iha fatin pagamentu, depois identifika katak, sira-nia naran laiha, sira-nia naran la loos no iha impedimentu balun," nia dehan.
Alende husi dadus reklamasaun hirak ne'e, MAE fornese mós dadus reklamasaun hamutuk rihun 1. 600 ba MSSI.

"MAE rasik rejista reklamasaun 1.600 husi benefisiáriu sira no MAE haruka ona ba MSSI," dehan Miguel.

Entretantu, verifikasaun ikus ba númeru reklamasaun hirak ne’e, sei hein pagamentu subsídiu ba benefisiáriu sira iha Rejiaun Administrativa Espesiál Oekusse Ambeno (RAEOA).

Tuir planu, pagamentu ba benefisiáriu sira iha RAEOA sei hahú iha loron 4 to'o loron 11 Jullu 2020.

Rate this item
(0 votes)
Last modified on Tuesday, 30 June 2020 15:20
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.