Posse Ba MG Na'in 21, PR : Ukun La’os Oportunidade Mas Responsabilidade

Foto Hamutuk PM Taur Matan Ruak no Membru VIII Konstitusional hamutuk ho PR Francisco Guterres Lu Olo hafoin membru governu na'in 21 simu posse iha palasiu Prezidensila, Dili (24/6) Foto Hamutuk PM Taur Matan Ruak no Membru VIII Konstitusional hamutuk ho PR Francisco Guterres Lu Olo hafoin membru governu na'in 21 simu posse iha palasiu Prezidensila, Dili (24/6) Foto Tempo Timor

Tempotimor (Dili)-Iha okaziaun Posse ba membru VIII governu foun, Prezidente Repúblika (PR) Francisco Guterres Lú-Olo apela responsabilidade ba membru governu sira no labele hare ukun ne’e nu’udar oportunidade ida.

 PR ofisialmente fó ona posse ba membru governu foun na'in 21 iha Palasiu Prezidensial Dili iha loron Kuarta lokraik. 

“Ukun Nasaun la’ós de’it oportunidade ida, maibé responsabilidade boot ida ba governu nu’udar  órgaun koletivu,  no ba  mós membru governu ida-idak," dehan Lú-Olo 

Iha serimónia toma posse ne'e Prezidente Repúblika (PR) Francisco Guterres Lú-Olo hato’o mensajem seluk katak, konduz ba governu ne’ebe lidera husi Primeiru Ministru Taur Matan Ruak presiza hala’o ho espiritu atu serve no sustentabilidade. 

"Ita-Boot sira bele uza esperiénsia horiuluk nian hodi aplika ba situasaun ohin loron nian, atu halo governasaun ida ne’ebé  sustentável no  hala’o dezenvolvimentu paíz nian ba moris di’ak ba ita-nia ema liu tokon ida,  ne'ebé  hein ho fiar ida ne’e,  husi  Ita boot sira," mensajem PR Lú-Olo nian ba PM Taur no nia elementu sira, Kuarta (24/06)

Nia afirma, povu barak hein hela servisu husi governu, kona-ba povu nia moris di'ak. 

"Ita-nia povu hein buat barak husi ita boot sira! Prezidente Repúblika enkoraja Ita-Boot sira no, liuhosi ninia knaar konstitusionál, sei kontribui ba Ita-Boot sira hetan susesu. Maibé Governu nia susesu  sei depende liuliu ba Governu rasik.

Membru governu ne'ebé ohin (24/06) toma posse ba faze daruak ne'e hamutuk na'in 21, kompostu husi ministru na'in 7, vise ministru na'in  9 no sekretáriu estadu na'in 5.

Entretantu VIII Governu Konstitusional ne'ebe lidera husi PM Taur Matan Ruak, hamutuk na'in 44, kompostu husi kargu vise Primeiru Ministru na'in 2, kargu Ministru na'in 20, kargu Vise Ministru na'in 11 no kargu Sekretáriu Estadu na'in 11.

Rate this item
(0 votes)
Last modified on Wednesday, 24 June 2020 23:46
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.