CNRT: Alkatiri husik Todan Ro Haksolok ba PM Taur

Ro Haksolok iha momentu inaugurasaun iha Portugal Ro Haksolok iha momentu inaugurasaun iha Portugal Foto Pagina ZEESM

Tempotimor (Dili)-Bankada CNRT iha Parlamentu Nasionál sukit fila fali problema ro Haksolok ne’ebé to’o ohin seidauk to’o Timor-Leste.

Deputadu Bankada CNRT, Gabriel Soares hatete, Sekretariu Jeral FRETILIN Mari Alkatiri promete atu lori Ro Haksolok mai TL, maibé ro ne’e ‘mout’ ona ho osan povu nian tokon $20.

"Mari Alkatiri labele haluha mós katak ro-ahi Haksolok, ne’ebé selu tiha ona ho osan liu ona $20 milloens de dólares, to’o agora seidauk mai Timor-Leste no Mari Alkatiri lohi Dom Carlos Filipe Belo no Madre Guilhermina Marçal hodi fó bensaun no sai madriña ba besi mamuk ida, ida ne’e mós hanesan insultu ida ba Igreja Katólika no ba Povu Timor-Leste tomak," dehan Gabriel iha sala bankada CNRT, Kuarta (24/06).

Bainhira Ró Haksolok nia iss laiha ona, Gabriel alega hodi dehan, nu’udar Prezidente Autoridade RAEOA dahuluk, Alkatiri lohi PM Taur hodi husik hela todan ne'e ba governu Taur nian.

"Pior liu, kona-ba Ró Haksolok, Mari Alkatiri buka lohi Primeiru Ministru atu simu tiha todan ne’e, hodi fó tán $14 milhoens ba Luis Pité ho nia kroni sira, hodi kontinua bosok katak hadia Ro Haksolok, ne’ebé tinta mós monu hotu no ekipamentus sira afinal át hotu," alega deputadu ne’e.

Entretantu, molok ne’e, José Luis Guterres iha nia loron ikus hanesan eis Prezidente Autoriedade RAEOA hatete, so Maromak tulun mak ro Haksolok bele mai TL.

"Ró Haksolok atu mai Timor-Leste ne'e maromak nia tulun karik, mais ba ita ema hanesan sidadaun normal ne'e defisíl," dehan J.Luis iha 10 Juñu liu ba.

J.Luis hatete, empreza ne'ebé halo konstrusaun ba Ró Haksolok ne'e lulun biti ona.

"Empreza ne'e husu tan osan pur-volta tokon $13 par atu kompleta Ro Haksolok ne'e, maibé hanesan PA ha'u hanoin lei jestaun finanseira la fó dalan, hodi ha'u fó osan ba empreza ne'ebé bangkrut  tiha ona! Portugal de'it mós la fó apoiu atu rekopera empreza ida ne'e, entaun tanba saida mak orsamentu ne'ebé Parlamentu Nasionál fó ba povu Oekusse-Ambeno, ha'u tenke investa fali ba empreza ida ne'ebé bangkrut tiha ona!, ne'ebé inísiu kedas ha'u la simu ida ne'e," dehan J.Luis.

Rate this item
(1 Vote)
Last modified on Wednesday, 24 June 2020 17:31
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.