Alkatiri liu husi ninia pajina facebook informa katak nia advogadu prepara ona atu lori CPN partidu CNRT ba tribunal tanba iha públikasaun media centre CNRT hatete katak CPN partidu nian mak fó sai deklarasaun suborno ne’e.
"Relasiona ho informasaun falsu ne'ebé públika hanesan iha foto ne’e, ha'u-nia advogadu sira prepara hela no iha tempu badak ha'u sei hatama keisa krime ba Ministériu Públiku. Sira ne'ebé assina desizaun CPN/CNRT sei ba Ministériu Publiku atu hatán ba akuzasaun ida ne'e,” deklara Alkatiri iha ninia estatutu facebook ne’ebé www.tempotimor.com asesu, Tersa (23/06).
Media centre CNRT iha ninia publikasaun hatete, Sekjer FRETILIN 2000 (F200) Alkatiri hahú kanta iha media sosial kona-ba korrupsaun, liu-liu akuza lider CNRT Kay Rala Xanana Gusmão nu’udar korruptór boot ne’ebé daudauk ne’e habelar korrupsaun iha povu TL nia leet.
“Akuzasaun ida ne’e laiha fundamentu no Sekjer F2000 Mari Alkatiri kontinua uza korrupsaun nu’udar estratejia kampaña politika atu lohi povu no fó naran at ba Maun Boot Xanana,” hakerek Media Centre CNRT iha ninia pajina facebook.
MC CNRT ne’e hatete, uniku estratejia ida ne’e mak bele manipula militante F2000 sira nia neon hodi konsidera Xanana nu’udar korruptor no louva Alkatiri nu’udar anju iha RDTL.
“Maibé tebes duni katak Mari Alkatiri ho F2000 Anju sala laek iha Timor-Leste? Resposta mak hanesan tuir mai ne’e: Iha tinan 2000, ConocoPhillips halo pagamentu subornu ka suap ho montante millaun $2.5 ba Mari Alkatiri atu foti desizaun favoravel ba ConocoPhillips relasiona ho mina no gas iha Tasi Timor. Iha tinan 2001, ConocoPhillips entrega karreta Toyota Hilux-Surf hamutuk unidade 13 ba Mari Alkatiri nu’udar subornu ba MA atu foti desizaun ne’ebé favorese ba ConocoPhillips. Iha Jullu 2001, Mari Alkatiri simu subornu $74,000 liu husi nia alin Ahmed Alkatiri nia konta banku iha ANZ ho numeru konta: 01649***** no iha Mari Alkatiri nia konta banku: 01590****. Iha Outubru 2001, ConocoPhillips selu tan subornu $44,000 ba Alkatiri nia konta banku iha Darwin, Casuarina. Iha Maiu 2002, CEO ConocoPhillips, Sr. Mulva hola parte iha selebrasaun restaurasaun independensia no lori osan cash Millaun $2 no entrega ba Alkatiri. Osan sira ne’e ikus mai transporta ba ba Australia no rai iha Ahmed Alkatiri nia konta banku iha Wespac Bank,” hakerek MC CNRT.
MC CNRT kontinua nia akuzasaun katak, atu halakon evidensia, Ahmad Alkatiri loke konta banku ho naran haat: Ahmad Alkatiri, Ahmad Bin Hamud Alkatiri, Ahmed Alkatiri, no Ahmade Hamute Alkatiri.
Iha Jullu 2002, ConocoPhillips haruka tan osan $130,000 ba Ahmad Alkatiri nia konta iha Banku ANZ. Ahmed Alkatiri simu tan osan $54,000 ne’ebé depozita iha konta Banku ANZ nian ho Mari no Ahmed Alkatiri nia naran.
Tuir MC CNRT, kazu subornu ne’e rejista iha United States District Court for The District of Columbia, Tribunal refere la julga ba substansia materia keixa ne’ebe Oceanic Exploration hato’o no indefere ho razaun Tribunal ne’e laiha kompetensia atu julga kazu ne’e.
Aleinde temi Alkatiri no nia alin Ahmed Alkatiri, MC CNRT mós akuza membru governu governasaun dahuluk, Ana Pesoa.
“La’os de’it Mari Alkatiri mak komete subornu ka suap ne’ebé konsidera hanesan korrupsaun ho osan montante besik millaun $3 husi ConocoPhillips, maibé membru governu husi I Governu mós komete korrupsaun, hanesan: Ministra STATAL, Ana Pessoa komete korrupsaun manipulasaun prazu ba jerador unidade 52. Presu jerador sira ne’e iha Dili kada unidade ho valor $800, enkuantu Ana Pessoa importa jerador ho marka no espesifikasaun hanesan husi Surabaya ne’ebé kada unidade ho valor $3,200,” CNRT-MC suspeita.
“Ida ne’e katak Ana Pessoa manipula presu ho marjin $2,400 kada unidade, katak Ana Pessoa hariku an ho osan hamutuk $2,400x52=$124,800,” akuza MC CNRT.
Tuir MC CNRT, kazu ne’ebé Ana Pesoa komete nunka mosu iha Tribunal tanba Ana Pessoa sai husi STATAL asume kedas kargu nu’udar Prokurador Jeral Republika. Ana Pessoa fó kontratu single source ba kompaña imprime balun ho naran Di*** Printing.
Akuzasaun ba Alaktiri la’os to’o ne’e de’it, MC CNRT kontinua akuza katak Alkatiri fó kontratu ba nia alin Bader Alkatiri liu husi nia kompaña Cav** Bra** Ltd hodi sosa kilat musan hamutuk musan 257,000 ho valor $108,000 iha 2002, bainhira povu presiza liu nesesidade baziku sira seluk.
“Ida ne’e hatudu momoos aktu korrupsaun no partisipasaun ekonomika ne’ebé envolve maun-alin Mari no Bader Alkatiri. Kazu sira ne’e nunka sobre sai tanba arkiva hotu bainhira Ana Pessoa sai PJR,” deklara MC CNRT.
Aleinde aktu korrupsaun iha Governu dahuluk, MC CNRT dehan mós, Tribunal de Contas halo ona auditoria ba Alkatiri nia ukun iha RAEOA-ZEESM ne’ebé deskobre katak Alkatiri komete korrupsaun iha pagamentu ba ro-ahi Haksolok.
