Liu husi votasaun ba proposta alterasaun ne’ebé aprezenta husi bankada FRETILIN, CNRT no PLP, maioria deputadu vota a favor, laiha kontra no laiha abstensaun.

Deputada CNRT Fernanda Lay ne’ebé sai proponent ba proposta alterasaun ne’e hatete, nia parte halo proposta ne’e tanba PN la utiliza osan refere.

"Osan rihun $500 ba PN ne'e polémika teb-tebes, ne'ebé iha transferénsia dahuluk ami mak sai alvu ba situasaun ida ne'e, ami konsiente katak ami labele uza osan ne'e ba parlamentu rasik, depois osan ba fundu Covid-19 menus, entaun ami propoin par reduz tiha no kompensa ho montante ne'ebé uza ba iha ne'ebá, par PN rasik labele simu tan o fatia do bolu ba nia aan rasik," dehan deputada Fernanda Lay iha plenária PN, Tersa (23/06).

Iha fatin hanesan deputada FRETILIN, Maria Angelica Rangel nu'udar mós proponente dehan, proposta refere nia objetivu mak atu haruka fila osan rihun $500 ba saldo tezouru.

"Proposta ida ne'e ho objetivu atu reduz fali osan rihun $500 ne'ebé iha levantamentu dahuluk hodi mai iha PN, tanba ne'e ami hamutuk ho bankada opozisaun atu reduz osan rihun $500 ne'e, tanba PN la uza, nune'e osan ne'e fila ba saldo tezouru nian," dehan Rangel.

Deputada husi bankada PLP, Maria Angelina Lopes Sarmento dehan, osan refere la utiliza iha PN, nune'e fila ba kofre estadu.

"Osan iha rihun $500 ne'e to'o agora la utiliza, depois osan refere sei preve iha Ministériu Finansas (MF), depois PN la uza, entaun di'ak liu transfere de'it ba fundu Covid nian hodi maksimiza, hodi reforsa ba kofre tezouru,” dehan nia.

Entretantu, Ministru Finansas Fernando Hanjam, konkorda ho PN hodi devolve fali osan rihun $500 ba saldo tezouru.

"Kona-ba alterasaun ba artigu ne'ebé iha dadaun, ami konkorda ho saida mak deputadu sira propoin mai," dehan Ministru Fernando.