Xefe Governu ne’e iha garantia tanba to’o ohin loron seidauk iha informasaun ruma husi PR Lu Olo atu rezeita kandidatu membru governu iha lista ne’ebé aprezenta ona.
"To'o agora seidauk iha informasaun husi sua eselénsia Prezidente Repúblika,” dehan PM Taur iha Palásiu Prezidensiál Bairu-pite Dili, Kinta (18/06).
Nia dehan, to’o ohin seidauk iha mudansa ba lista membru governu na’in 19 ne’ebé nia aprezenta ona ba PR Lu Olo.
"Lista membru governu dadauk ne'e seidauk iha mudansa, laiha mudansa. Ne'ebé kona-ba ajenda toma posse ne'e PR mak determina, la'ós PM," nia dehan.
Molok ne’e, iha lista membru governu na’in 8 ne’ebé simu ona pose, konsege mosu mudansa ba kandidatu ministru Administrasaun Estatal no Ministru Turizmu, Komersiu no Industria. Kandidatu ne’ebé aprezenta husi partidu FRETILIN ne’e tenke troka ho figura seluk tanba PR Lu Olo rezeita.
