Fidelis dehan, la’os de’it Vietnam, maibé kompara ho nasaun membru ASEAN sira seluk hanesan Laos, Kambodia no Mianmar, TL nia ekonomia sei di’ak liu.
"Ita kompara ita-nia aan ho nasaun sira seluk ne'ebé sai ona membru, liu-liu iha 1990, hanesan Vietnam, Laos, Kambodja, Minmar hotu, se ita kompara ho sira, ita-nia kondisaun di'ak liu, parte rekursu umanu (RH Sigla Portuges) no ekonomia ita di'ak liu, kompara ho sira," dehan Fidelis ba jornalista sira iha Palásiu Governu, Kuarta (17/06).
Tan ne’e, ministru ne’e dehan, TL presiza husu ba nia an tanba sa mak to’o ohin loron seidauk bele sai membru ASEAN.
"Ita tenke husu perguntas ba ita-nia aan katak, tanba saida uluk sira tama, rekezitus ne'e la aas loos, maibé agora Timor atu tama, maske Timor nia kondisaun di'ak liu sira seluk, maibé tanba saida mak to'o agora seidauk iha de'it konsensu ida iha Asean atu halo Timor tama," dehan Fidelis.
Ba kestaun dezenvolvimentu, ministru ne’e mós dehan, kompara ho nasaun seluk dezenvolvimentu iha TL di’ak ona.
"Ein-termus dezenvolvimentu rai laran, ita kompara ho nasaun membru hanesan Laos, Kambodia, Vietnam, ita bele dehan, la di'ak liu, maibé pelumenus komparavél ho sira."