Dom Carlos ninia mensajen ne’e, publika iha pajina facebook Timorese Association Inclusive Support (TAIS), relasiona ho timoroan sira ne’ebé baku malu to’o balun kanek, iha Market Square, Thomas Street no Union Place, Norte Irlánda, sábadu (13/06).
Mensajen Video ne’e, Dom Calos husu atu joventude Timoroan sira iha Norte Irlanda tenke hametin unidade no trankilidade, husik ódio ba kotuk, hako’ak malu hanesan maun-alin, foti Timor Leste nia naran iha malae nia rain.
"Boa tarde ba familia tomak no komunidade iha Dungannon, atan ha’u Bispu Carlos Ximenes Belo hato'o kumprimentus ba imi, hakoak bo'ot, ha’u nia orasaun, ha’u husu ba Maromak atu fó bensa ba imi, atu imi kuida nafatin imi nia unidade, paz no trankilidade, labele baku malu tan”, nia apela.